13.05.2026 | 23:03
Երևանի և 10 մարզի մի շարք հասցեներում էլեկտրաէներգիայի անջատումներ կլինեն
«ՊԵԿ-ից ժամանակ էին տվել մինչև հունվարի 20-ը, չէ՝ ուժով կհանենք»․ ՊՆ նախկին շենքում ապրողների ահազանգը․ ՏԵՍԱՆՅՈՒԹ
Հասարակություն
24.01.2023 | 21:00
Ռուզաննա Պողոսյանն ամուսնու և որդու հետ արդեն հինգ ամիս է՝ ապրում է Պաշտպանության նախարարության նախկին համալիրի շենքերից մեկում։ Մինչև այստեղ տեղափոխվելը վարձով են ապրել, սակայն վարձի գումարի բարձրացման պատճառով ընտանիքը ստիպված է եղել դուրս գալ հին բնակարանից։ Այսօր արդեն հինգերորդ օրն է, ինչ անջատված է շինության էլեկտրամատակարարումը։ Բնակիչները երեկ, ի նշան բողոքի, փակել էին Աշտարակի խճուղու երթևեկությունը։
Ընտանիքի միակ աշխատողը Ռուզաննան է։ Ե՛վ Ռուզաննան, և՛ ամուսինը հստակ չեն ասում, թե ով է նրանց այս շենքում ապրելու թույլտվություն տվել։ Բնակիչները հոսանքի համար վճարում երբեք չեն արել, բայց ասում են՝ պատրաստ են նաև վճարել։
Գեղամ Բաղդասարյանը մոր, կնոջ և չորս երեխաների հետ 6 ամիս առաջ Է Եղեգնաձորից տեղափոխվել Պաշտպանության նախարարության նախկին շենք։ Նրա խոսքով՝ 2018 թվականին Պաշտպանության նախարարության այս տարածքը հանձնվել է Տարոն անունով ինչ-որ բնակչի, ով էլ իր հերթին հնարավորություն է տվել սոցիալապես անապահով մարդկանց հաստատվել շենքում։ Նրա դիտարկմամբ՝ տարածքում 180 բնակիչ կա, որոնք պատերազմի մասնակից, բազմազավակ և սոցիալապես անապահով ընտանիքներից են։
«Հայաստանի էլեկտրական ցանցեր» ՓԲԸ-ից Factor TV-ին հայտնեցին, որ Պաշտպանության նախարարության նախկին շենքի բաժանորդը դիմել է Հայաստանի էլեկտրական ցանցեր հոսանքն անջատելու խնդրով։ Դեռևս 2022-ի գարնանը Կառավարության որոշումներից մեկով Պաշտպանության նախարարությանը պատկանող 71 միավոր գույք, այդ թվում՝ Պաշտպանության նախարարության նախկին վարչական շենքը, ամրակցվել է Պետական գույքի կառավարման կոմիտեին՝ օտարելու կամ այլ նպատակով տնօրինելու համար։ Նախատեսվում է 2027 թվականին Երևան-Աշտարակ ավտոճանապարհի հարևանությամբ տեղակայված համալիրում մեկտեղել Պետական եկամուտների կոմիտեի բոլոր ստորաբաժանումները։ Այսինքն՝ այս պահին շենքը գտնվում է Պետական եկամուտների կոմիտեի տնօրինության տակ։
Factor TV-ն փորձեց ճշտել՝ արդյո՞ք Պետական եկամուտների կոմիտեն է «Հայաստանի էլեկտրական ցանցերի» հետ պայմանագիր ունեցող բաժանորդը, որի հորդորով անջատվել է շենքում բնակվողների էլեկտրամատակարարումը, սակայն Կոմիտեից մեզ պատասխանեցին, որ Պաշտպանության նախարարության նախկին շենքի շուրջ ստեղծված իրավիճակի հետ կապված հանդես կգան պաշտոնական հաղորդագրությամբ։
Մանրամասները՝ տեսանյութում։
Անի Թամրազյան
