31.05.2026 | 10:20
Քաղաքացիները կարո՞ղ են հետ ստանալ «կարմիր գծերի» համար վճարված գումարները․ ուժի մեջ է մտել Վարչական դատարանի որոշումը
Վրաստանը թույլ չի տվել Ադրբեջանի ընդդիմադիր կուսակցության փոխնախագահին մուտք գործել երկիր
Քաղաքականություն
12.01.2023 | 22:27
Հունվարի 12-ին Սարփիի սահմանային անցակետում Ադրբեջանի գլխավոր ընդդիմադիր «Ժողովրդական ճակատ» կուսակցության փոխնախագահ Սեյմուր Հազիին Թուրքիայից թույլ չեն տվել Վրաստան մտնել։
Ադրբեջանական լրատվամիջոցների հետ զրույցում Հազին պատմել է, որ հունվարի սկբզին մեկնել է Վրաստան, այնտեղից էլ՝ Թուրքիա, որտեղ քաղաքական կուսակցությունների ներկայացուցիչների հետ հանդիպումներ է անցկացրել։ Թուրքիայից Վրաստան վերադառնալիս նրան չեն թողել հատել սահմանը։ Վրացի սահմանապահները չեն բացատրել արգելքի պատճառը։
Հազիի խոսքով՝ Վրաստանից Թուրքիա մեկնելիս իրեն ոչ մի պահանջ չի ներկայացվել։ Գործիչը կարծում է, որ Վրաստան մուտքի մերժման հետևում կանգնած են Ադրբեջանի իշխանությունները։
«Կառավարությունը շատ դժգոհ է Թուրքիա իմ այցից»,- ասել է Հազին՝ հավելելով, որ վրացի փաստաբանները զբաղվում են իր հարցով։
Վրաստանի պետական մարմինները դեռ չեն մեկնաբանել իրավիճակը։
Հիշեցնենք, որ Սեյմուր Հազին բազմիցս հետապնդվել է Ադրբեջանում քրեական և վարչական գործերով։ 2014 թվականին նա խուլիգանության շինծու մեղադրանքով դատապարտվել է 5 տարվա ազատազրկման և պատիժը կրել ամբողջությամբ։
Էմմա Չոբանյան
