Սուրբ Ծնունդը՝ առանց սննդի ու դեղորայքի. Արցախում խանութներն ամբողջությամբ դատարկ են․ ՏԵՍԱՆՅՈՒԹ

Բլոկադայի 25-րդ օրն Արցախում մթերային խանութները գրեթե դատարկ են:

Խանութներից մեկի աշխատակից Տոնյա Մուրադյանն ասում է. «Ներկա պահին ոչ մի սնունդ չկա: Խանութը գրեթե դատարկ վիճակում է: Վիտրինաները դատարկ են: Խանութում կարող ենք ջրեղեն, հաց ու խմիչք գտնել»:

Գնորդներից մեկը նշում է․ « Խանութներում տնտեսականին քիչ-միչ է, այն էլ սպառվում է: Բանջարեղեն ընդհանրապես չկա վաղուց»:

Օրեր առաջ սկսել են պետական պահուստներից սահմանափակ քանակությամբ որոշ ապրանքներ ստանալ, որը սակայն չի բավարարում: Օպերատիվ շտաբից որոշ ապրանքներ ստանում են խանութները:

Գնորդներից մեկն էլ նշում է. «Ուտելիք ենք ման գալիս, տեսնենք որտեղից ենք ինչ գտնում, որ գոյատևենք: Համարյա ոչինչ չկա»:

Տոներից հետո փակ խանութներն ավելացել են: Որոշները հասցրել էին փակվել դեռ 2022-ի վերջին:

Մարդկանց մի մասն էլ դժգոհում են տեղական ապրանքատեսակների՝ մանավանդ կանաչեղենի անհիմն թանկացումներից:

Շատերը տեսախցիկի առաջ չեն ցանկանում խոսել իրենց մտահոգությունների մասին: Իսկ դրանք շատ են: Նույնիսկ դեղատուն մտնողներն են հաճախ դատարկաձեռն հեռանում:

Հիշեցնենք՝ 25 օր է, ինչ Արցախը շրջափակման մեջ է: Ադրբեջանը շարունակում է «բնապահպանների» անվան տակ փակ պահել Արցախն աշխարհին կապող «կյանքի ճանապարհը»:

Արցախում 120 000 մարդ, որից 30 000-ը երեխաներ են, այս տարի Ամանորը դիմավորել են շրջափակման մեջ։ Ադրբեջանցիների կողմից Արցախը Հայաստանին կապող ճանապարհի փակման պատճառով 1100 արցախացի, որնցից 270-ը երեխաներ են,  տուն վերադառնալու հնարավորություն չունի։

Մանրամասները՝ տեսանյութում։