22.11.2024 | 22:27
Ինչու 1 օրում 6 պաշտոնյա հրաժարական տվեց. Փաշինյանի պարզաբանումը. ՏԵՍԱՆՅՈՒԹ
ՌԴ-ն թող Բաքվից նեղվի՝ ոնց են նվաստացնում ձեր խաղաղապահին․ չի՞ վիրավորվում ձեր ինքնասիրությունը, ՀՀ-ից եք նեղացել․ Տաթևիկ Հայրապետյան․ ՏԵՍԱՆՅՈՒԹ
Քաղաքականություն
22.12.2022 | 20:17
Ադրբեջանի ԱԳ նախարարի հետ հեռախոսազրույցում ՌԴ ԱԳ նախարար Սերգեյ Լավրովն ափսոսանք է հայտնել Երևանի որոշման կապակցությամբ՝ չմասնակցել այս տարվա դեկտեմբերի 23-ին Մոսկվայում ՌԴ-ի, ՀՀ-ի և Ադրբեջանի արտգործնախարարների հանդիպմանը՝ քննարկելու խաղաղության պայմանագրի նախապատրաստումը։
ՀՀ արտաքին քաղաքական գերատեսչությունը պատասխանեց, որ ՀՀ ԱԳ նախարարի առաջնահերթությունը հիմա Լաչինի միջանցքի վերագործարկումն ու Լեռնային Ղարաբաղում հումանիտար ճգնաժամի արդյունքում ստեղծված խնդիրների հասցեագրումն է, ինչից ելնելով՝ հայկական կողմը խնդրել է հետաձգել Մոսկվայում նախատեսված հանդիպումը։ ՀՀ ԱԳՆ-ն հիշեցրել է, որ Ադրբեջանին փոխանցել է իր առաջարկները խաղաղության պայմանագրի հարցով։
Factor TV-ի հարցազրույցում ադրբեջանագետ Տաթևիկ Հայրապետյանից հետաքրքրվեցինք՝ գուցե պատահական չէ՞ր Մոսկվայի հանդիպմանն ընդառաջ շրջափակման ենթարկել Արցախը, որ ՀՀ-ի հետ սակարկման դաշտ ստեղծվի ԱԳ նախարարների հանդիպմանը և փորձ արվի թուլացնել Երևանի դիրքերը։
«Ես կարծում եմ, որ եթե այս պահին օրակարգի հարցը դա չէր՝ Լաչինի միջանցքի բացումը, այլ պետք էր գնալ ինչ-որ խաղաղության պայմանագրի տեքստ քննարկել, ապա ճիշտ որոշում էր չգնալը։ Այսօր թեժ հումանիտար օրակարգային հարց կա, և նորմալ է հետաձգելու այս պատճառաբանությունը»,- ասաց նա։
Տաթևիկ Հայրապետյանը, սակայն, չի բացառում, որ ՌԴ-ում մոտ օրերս ԱՊՀ միջացառման շրջանակում ենթադրաբար տեղի ունենալիք եռակողմ հանդիպման ժամանակ ՌԴ նախագահ Վլադիմիր Պուտինը փորձի մտնել իր հեղինակության դերի մեջ և փորձի լուծել միջանցքի հարցը։ Բայց Հայրապետյանը մեծ ակնկալիք ունի նաև Արևմուտքից․ «Այսօր կան պետություններ, այդ թվում, առաջին հերթին՝ ԱՄՆ-ն, որոնք կարող են հարց լուծել, Ադրբեջանի նկատմամբ լծակներ ունեն՝ հումանիտար ճգնաժամը բացառելու առումով։ Ես կոչ կանեմ օգտագործել այդ լծակները․ խոսքը 120 հազար մարդու մասին է»։
ՌԴ-ի պարտավորությունների մասով Տաթևիկ Հայրապետյանի մոտեցումը հստակ է․ եթե այդ պետությունն է ստանձնում անվտանգության երաշխավորի դերը, ուրեմն՝ պարտավոր է կատարել դրանք։
«Եթե չեն կարողանում իրենք, թերանում են, գոնե ազնվություն ունենան ասելու, որ ի վիճակի չեն, որ հասկանանք՝ ինչ այլընտրանքային ուղիներ ենք գտնում։ Եթե ՌԴ-ն նեղվում է իր խաղաղապահների նկատմամբ վերաբերմունքից, որ առկա է ՀՀ-ում, թող մի քիչ էլ Բաքվից նեղվեն։ Իրենց ինքնասիրությունը չի՞ վիրավորվում նվաստացումից»,- հարց բարձրացրեց ադրբեջանագետը։
Հարցազրույցն ամբողջությամբ՝ տեսանյութում։
Ռոբերտ Անանյան
