15.09.2026 | 16:23
Ես Բաքու գնալու կոչ չեմ արել ՄԻՊ-ին. Լիլիթ Գալստյան․ ՏԵՍԱՆՅՈՒԹ
Արցախում ծանր վիճակում գտնվող բուժառուի կյանքը փրկել չի հաջողվել․ 1 հոգի տեղափոխվել է Երևան․ ՏԵՍԱՆՅՈւԹ
19.12.2022 | 18:53
Ստեփանակերտ-Գորիս միջպետական մայրուղու փակման հետևանքով արդեն 8-րդ օրն է առողջապահության նախարարության ենթակայության տակ գործող բուժհաստատություններում շարունակում են ծանր և ծայրահեղ ծանր վիճակում գտնվող հիվանդներ մնալ։ Հիվանդանոցներում դադարեցված են բոլոր պլանային վիրահատությունները։ Առավոտյան հայտնի դարձավ, որ ծանր վիճակում գտնվող մեկ հիվանդ մահացել է։
Սրտի հրատապ վիրահատության կարիք ունեցող մեկ հիվանդ Կարմիր խաչի ուղեկցությամբ շտապ օգնության մեքենայով Լաչինի միջանցքով տեղափոխվել է Երևան։ Հիվանդը տեղափոխվել է Գորիսի բժշկական կենտրոն, ապա ռեանիմոբիլով Երևանի մասնագիտացված բժշկական կենտրոն:
Ադրբեջանական լրատվամիջոցները, որոնք ակտիվ տարածում են շտապ օգնության մեքենայի անցնելու կադրերը, բնականաբար չեն ասի, թե ինչու է մեկ հիվանդին միանգամից մի քանի մեքենա ուղեկցում՝ Ոստիկանության, Կարմիր խաչի , խաղաղապահների: Մեկ հիվանդի տեղափոխմամբ Արցախի առողջապահության համակարգի խնդիրները չեն պակասել: Բազմաթիվ հիվանդներ այսօր հնարավորություն չունեն Երևան հասնել: Հանրապետական հիվանդանոցում այս պահին ստացիոնար բուժում է ստանում 92 հիվանդ։
Հիվանդանոցի ռեանիմացիոն բաժանմունքում այս պահին 11 հիվանդ է գտնվում, 4-ը՝ ծայրահեղ ծանր վիճակում։ Միջանցքը փակվելուց հետո առաջին օրերին ծանր վիճակում գտնվող 2 հիվանդի վիճակ այս պահին կայուն է։
Պատկերը նույնն է նաև Ստեփանակերտի Արևիկ բուժմիավորումում։ Ստեփանակերտ-Գորիս միջպետական մայրուղու փակման հետևանքով մանկական հիվանդանոցում մեծ դժվարություների են բախվել։ Հատկապես տարվա այս եղանակին շատ են սուր շնչառական հիվանդությամբ դեպքերը։ Վերակենդանացման, ինտենսիվ թերապիայի և նորածնային բաժանմունքում այս պահին 12 երեխա է գտնվում։
Ռեանիմացիոն բաժանմունքում գտնվող երեխաներից մեկը՝ 4 ամսական մի փոքրիկ, ծայրահեղ ծանր վիճակում է։ Արևիկ մանկական բուժմիավորման գործադիր տնօրենի գնահատմամբ նրա կյանքին վտանգ է սպառնում։ ՀՀ մասնագետների հետ խորհրդակցելով՝ առցանց կապով Արցախի բժիշկները փոքրիկին անհրաժեշտ բուժօգնություն են ցուցաբերում։ Բայց Երևան տեղափոխելու անհրաժեշտություն կա։
Արցախի Հանրապետության առողջապահության նախարարության ենթակայության տակ գործող բուժհաստատություններում այս պահին անհրաժեշտ դեղերի և բժշկական պարագաների պակաս չկա, սակայն պաշարները սպառվում են: Հիվանդանոցներում ահազանգում են՝ Ճանապարհը երկար փակ մնալու դեպքում իրավիճակը կարող է ծայրահեղ բարդանալ։
Արմինե Պետրոսյան
