07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
Նկարիչների միությունը սպառված և ինքնանպատակ կառույց է, Աղամյանը պետք է հեռանա․ բողոքի ակցիան շարունակական կլինի. ՏԵՍԱՆՅՈՒԹ
08.06.2018 | 19:41
Այսօր Նկարիչների միությունում իրականացվեց բողոքի ակցիա՝ միության անդամ նկարիչների մասնակցությամբ։ Նրանք պահանջում էին, որ միության ղեկավարությունը՝ ի դեմս նախագահ Կարեն Աղամյանի, հրաժարական տա, որ փոխվի միության կանոնադրությունը, նկարիչները տեղյակ լինեն ֆինանսական հոսքերից, այդ ֆինանսների բաշխումից։
Ակցիայի մասնակիցները պնդում էին, որ քսան տարի շարունակ միության նախագահությունը ստանձնած Կարեն Աղամյանը Հայաստանում և արտասահմանում կազմակերպվող ցուցահանդեսներին ներկայացրել է միայն իր և յուրայինների գործերը։ Ակցիայի մասնակիցների թվում էին Խաչիկ Հարությունյանը, Ղազար Միրզոյանը, Արմինե Ավետիսյանը, Արա Շահումյանը, Հաղթանակ Շահումյանը։
Նրանք միաբերան պնդում էին, որ միությունը վաղուց արդեն չի կատարում իր գործառույթները և ոչ մի կերպ չի նպաստում հայ ժամանակակից կերպարվեստի հանրահռչակմանը։ Ակցիայի մասնակիցների խոսքով՝ ճիշտ կլինի, եթե միության նախագահությունը ստանձնեն երիտասարդներ։
Նշենք, որ Նկարիչների միության նախագահ Կարեն Աղամյանը Ուկրաինայի մայրաքաղաք Կիևում էր և դեռևս չի արձագանքել նկարիչներին։ Վերջիններս մտադիր են մեկ ակցիայով չբավարարվել՝ մինչև կհասնեն իրենց նպատակների իրագործմանը։
Աննա Բաբաջանյան
