11.01.2025 | 14:41
Տրանսպորտից օգտվելու տոմսային ինչպիսի փաթեթներ են առաջարկվում․ մանրամասնում է Երևանի քաղաքապետարանը
Ալիևը կբացի միջանցքը, երբ ՀՀ-ն դիմի ՄԱԿ-ի ԱԽ՝ բազմազգ ուժեր տեղակայելու հարցով․ վարչապետը պիտի արագ գործի․ Ստեփան Գրիգորյան. ՏԵՍԱՆՅՈՒԹ
Քաղաքականություն
13.12.2022 | 20:02
Ադրբեջանցիներն ավելի քան մեկ օր փակ են պահել Լաչինի միջանցքը, ինչը նշանակում է, որ Ադրբեջանը շրջափակման մեջ է պահում Արցախը՝ ռուս խաղաղապահների աչքի առաջ։ Եվ սա այն դեպքում, երբ նոյեմբերի 9-ի հայտարարության 3-րդ կետի համաձայն՝ ԼՂ-ում շփման գծի երկայնքով և Լաչինի միջանցքի երկայնքով տեղակայվել է ՌԴ խաղաղապահ զորակազմ։ Ի՞նչ է փորձում անել Ալիևն այսպիսով, ի՞նչ մեծ ծրագրի մաս են կազմում այս սադրանքները։
Factor TV-ին տված հարցազրույցում քաղաքագետ Ստեփան Գրիգորյանն ասում է՝ կասկած չունի, որ Ադրբեջանի գլխավոր ծրագիրն Արցախի հայաթափումն է, և այս սադրանքները սպասարկում են այդ նպատակը։
«Վերջին՝ սեպտեմբերի 13-ի ագրեսիայից հետո, երբ Հայաստանը ադեկվատ գործեց՝ դիմեց ՄԱԿ-ի ԱԽ, ԵԱՀԿ, ԵՄ, աղմուկը շատ մեծ էր Ալիևի ագրեսիվ քայլերին, նաև աղմուկը շատ մեծ էր ռազմական հանցագործություններին մոտ ադրբեջանական գործողություններին։ Ալիևը հասկացավ՝ բիրտ ուժով Արցախի հայաթափումը մեծ աղմուկ կբարձրացնի, նաև կարող է իր համար անցանկալի քայլերի բերել, օրինակ՝ Ֆրանսիան և ԱՄՆ-ն ճանաչեն Արցախի անկախությունը։ Դա է պատճառը, որ ինքն այլ մեխանիզմներ է օգտագործում։ Ալիևը բոլոր քայլերը նախապես է պլանավորել»,- ասաց Ստեփան Գրիգորյանը։
Քաղաքագետը պահանջ է դնում ՀՀ իշխանությունների առաջ՝ հույս չդնել ՌԴ-ի վրա, գործել արագ և դիմել ՄԱԿ-ի ԱԽ-ին՝ Արցախում խաղաղապահ բազմազգ զորակազմ տեղեկայելու հարցով։ Ըստ Գրիգորյանի՝ ՀՀ իշխանությունների կողմից հարցը միջազգայնացնելու պարագայում միայն Ալիևը կբացի Լաչինի միջանցքը, քանի որ սանկցիաների ենթարկվելու հավանականությունը կմեծանա։
Նշենք, որ ՀՀ ԱԳՆ-ն հայտարարություն է տարածել միջանցքի փակման թեմայով, որում ակնարկ կա ՄԱԿ-ի ԱԽ դիմելու սցենարի մասին։
«Ամբողջ միջազգային հանրության, այդ թվում՝ ՄԱԿ-ի Անվտանգության խորհրդի, ԵԱՀԿ Մինսկի խմբի համանախագահող և անդամ երկրների հրատապ ուշադրությունն ենք հրավիրում, որ Ադրբեջանի գործողությունները կարող են հանգեցնել լայնածավալ հումանիտար աղետի: Ընդգծում ենք Լեռնային Ղարաբաղի հայության իրավունքների և անվտանգության ապահովման միջազգային մեխանիզմների գործարկման կամ վերագործարկման անհրաժեշտությունը և այս նպատակով առաջիկայում խորհրդակցություններ կսկսենք միջազգային գործընկերների հետ»,- նշել է ՀՀ ԱԳՆ-ն։
Հարցազրույցն ամբողջությամբ՝ տեսանյութում։
Ռոբերտ Անանյան
