Քանդել են, բայց հիմա սկսել են կառուցել. Սեյրան Օհանյանը՝ բանակում արվող փոփոխությունների մասին․ ՏԵՍԱՆՅՈՒԹ

Բոլոր այն հարցերը, որոնք վերաբերվում են Զինված ուժերի համալրվածությանը և զինծառայության գրավչությանը, անչափ կարևոր են մեր ժողովրդի համար։ Այս մասին խորհրդարանում լրագրողների հետ ճեպազրույցի ընթացքում ասաց «Հայաստան» խմբակցության ղեկավար Սեյրան Օհանյանը։
Նա նաև կարևորեց դրամական վարձատրության խնդիրը՝ ընդգծելով, որ դա պետք է դրվի ճիշտ հիմքերի վրա

«Հաշվի առնելով Հայաստանի ժողովրդագրական խնդիրները, նաև ռազմաքաղաքական իրավիճակը, անվտնգության միջավայրը, նաև ՀՀ յուրաքանչյուր քաղաքացու պարտքը հայրենիքին ծառայելու ուղղությամբ, մեր ԶՈՒ-ում խառը համալրման սկզբունքը դեռ երկար է տևելու: Այսինքն՝ և՛ պայմանագրային ծառայության և՛ ժամկետային ծառայության համալրվածության խնդիրը պետք է լուծենք։
Բայց պրոֆեսիոնալ բանակ ասելով՝ չպետք է միայն հասկանանք մարդկային ռեսուրսների համալրումը։ Պրոֆեսիոնալ բանակը լայն փիլիսոփայական հասկացություն է, որտեղ մարդու պատրաստվածությունը, կրթական մակարդակը, զինծառայության գրավչությունը պետք է համադրված լինեն ձետք բերվող սպառազինությանը և ստեղծված պայմաններին»,- նշեց Օհանյան:

Ինչ վերաբերում է ատեստավորման համակարգին, Օհանյանը նշեց, որ ԶՈՒ-ում ատեստացիոն համակարգ գոյություն ունի. «Յուրաքանչյուր կառույցում կան ատեստացիոն հանձնաժողովներ, և նրանք պարբերաբար աշխատելով որոշում են զինծառայողի համապատասխանությունը պաշտոնին, և արդյոք արժանի են առաջխաղացման: Ատեստացիան կապել միայն միայն հավելավճարի հետ, ճիշտ չէ: Նախ, անհավասար պայմանններ են լինելու միևնույն պաշտոններում գտնվողների միջև, երկրորդը՝ դա ազդելու է ծառայողական աճի վրա, որովհետև ատեստացիա անցնելով և հավելավճար ստանալով՝ որոշ մարդկանց մոտ կարող է բարձր պաշտոնի գնալու ցանկությունը վերանալ․ թափուր պաշտոններն են ավելանալու․․․ Ատեստավորման ու հավելավճարների խնդիրը կարող է բերել Զինված ուժերից արտահոսքի»։

Ընդդիմադիր պատգամավորի խոսքով՝ «Հայաստան» խմբակցությունն առաջարկել է թողնել ատեստացիոն համակարգը, այդ հավելավճարների սկզբունքը ավելացնել մասնագիտական որակական կարգերի համակարգում:

«Ինչ վերաբերում է «Պաշտպան հայրենյաց»-ին՝ ժամկետային ծառայությունից պայմանագրային ծառայության անցնելու հնարավորություն ընձեռելուն, Օհանյանը նշեց, որ «Հայաստան» խմբակցությունը կողմ է այս օրենսդրական փոփոխությանը։

Անդրադառնալով հարցին, թե արդյոք օրենսդրական այս փոփոխությունները բանակաշինությանն ուղղված քայլեր են, թե ոչ, Օհանյանն արձագանքեց․ «Մեկ քայլը՝ «Պաշտպան հայրենյացը», ուղղված է բանակի համալրմանը, դրան մենք կողմ քվեարկեցինք․ դա նշանակում է, որ դա դրական քայլ ենք համարում։ Դա շարունակությունն է այն գործընթացների, որ իրենք վերջին երկու տարիներին քանդել են բանակը և հիմա նորից սկսում են կառուցել։ Իսկ մյուս քայլին՝ կամավոր ատեստացիայի ներդրմանը, մենք կողմ չենք, քանի որ կարծում ենք, որ դա չի նպաստելու բանակաշինությանը»։

Մանրամասները՝ տեսանյութում։