Քաղաքականություն
01.12.2022 | 21:28
Ադրբեջանական Միլլի Մեջլիսն այսօր հայտարարություն է ընդունել նախօրեին Ֆրանսիայի Ազգային ժողովի միաձայն ընդունած Հայաստանին աջակցող ու Ադրբեջանի նկատմամբ պատժամիջոցներ առաջարկող բանաձևի վերաբերյալ։
«Ֆրանսիայի Սենատի կողմից 2022 թվականի նոյեմբերի 15-ին, նոյեմբերի 30-ին հայտնի բանաձևի ընդունումից հետո, այս երկրի Ազգային ժողովը նույնպես կանխակալ քաղաքական ակցիա է կազմակերպել Ադրբեջանի դեմ՝ բացահայտ անհարգալից վերաբերմունք ցուցաբերելով միջազգային իրավունքի նորմերի և սկզբունքների նկատմամբ։ Ընդունելով կողմնակալ և անարդար ակտ՝ ուղղված Ադրբեջանի տարածքային ամբողջականության և ինքնիշխանության դեմ»,-ասվում է հայտարարության մեջ։ Ադրբեջանի Մեջլիսը բանաձևը գնահատում է որպես «քաղաքական կեղծավորություն»։
«Ֆրանսիայի Սենատի և Ազգային ժողովի կողմից ընդունված այս բանաձևերը նշանավորում են Ֆրանսիայի օրենսդիր մարմնի վերածումը քաղաքական արկածախնդրության ասպարեզի: Մենք նաև կտրականապես մերժում ենք Ֆրանսիայի Ազգային ժողովի այս որոշումը և այն համարում ենք քաղաքական կեղծավորություն»,-ասվում է հայտարարության տեքստում։ Նաև նշվում է, որ այս բանաձևն, իբր, հարվածում է Հայաստանի ու Ադրբեջանի միջև հարաբերությունների կարգավորմանը։ Բացի այդ, Մեջլիսը Ֆրանսիայի հասցեին տարբեր անհիմն մեղադրանքներ է հնչեցնում՝ հանդես գալով նաև հայտյաց հռետորաբանությամբ։
Էմմա Չոբանյան
