Պեմզաշենում իրավիճակը լարվել է․ 5 կանայք փորձել են հրկիզել դաժան հանցագործության մեջ կասկածվողներից մեկի տունը

Պեմզաշենում դաժանաբար սպանված 31-ամյա Զարինե Մելիքսեթյանի ու նրա երկու մանկահասակ երեխաների հարազատները՝ մի խումբ կանայք, երեկ փորձել են վրեժ լուծել։ Նրանք երեկոյան ժամը 19։30-ի սահմաններում մոտեցել են սպանության մեջ կասկածվող Վրույր Բարսեղյանի տանը, մետաղյա ձողով կոտրել են պատուհանի ապակին՝ փորձելով ներս մտնել ու հրկիզել։ Ոստիկանությունից Factor.am-ին հաստատեցին այս տեղեկությունը։

Նրանց գործողությունները կանխել են տեղում հսկողություն իրականացնող ոստիկանները։ 5 կանանց հրավիրել են ոստիկանության Արթիկի բաժին։ Կանանցից մեկը, ցույց տալով ձեռքի մեկ լիտր տարողությամբ բենզինով շիշը, հայտարարել է, որ եկել էին վրեժ լուծելու և այրելու «Արթիկ» քրեակատարողական հիմնարկում գտնվող Վրույր Բարսեղյանի տունը։

Կանանց ոստիկանությունից ազատ են արձակել, նյութերն ուղարկել են Արթիկի և Անիի քննչական բաժին։

Հիշեցնենք, որ 31-ամյա Զարինե Մելիքսեթյանի ու նրա երկու մանկահասակ երեխաների սպանության մեջ կասկածվում է երկու անձ․ նրանցից մեկը Պեմզաշեն գյուղի 32-ամյա բնակիչ Վրույր Բարսեղյանն է, մյուսը նրա ազգականը՝ 41-ամյա Արկադի Բարսեղյանը։

«Ձեռք բերված բավարար ապացույցների համակցությամբ՝ 32-ամյա տղամարդուն մեղադրանք է ներկայացվել՝ ՀՀ քրեական օրենսգրքի 155-րդ հոդվածի 2-րդ մասի 6-րդ, 8-րդ և 13-րդ կետերով, 155-րդ հոդվածի 2-րդ մասի 3-րդ, 5-րդ, 6-րդ և 13-րդ կետերով (2 դրվագ), 252-րդ հոդվածի 3-րդ մասի 2-րդ կետով և 198-րդ հոդվածի 4-րդ մասով, իսկ վերջինիս 41-ամյա ազգականին՝ 155-րդ հոդվածի 2-րդ մասի 8-րդ, 13-րդ կետերով և 252-րդ հոդվածի 3-րդ մասի 2-րդ կետով: Միջնորդություն է ներկայացվել դատարան՝ նրանց նկատմամբ կալանավորումը որպես խափանման միջոց կիրառելու վերաբերյալ, ինչը բավարարել է: Նախաքննությունը շարունակվում է»,- ասվում է ՀՀ Քննչական կոմիտեի տարածած հաղորդագրության մեջ:

Արմիկ Մովսիսյան