ԱՄՆ Պետդեպը՝ Փաշինյան-Ալիև-Բլինքեն հեռախոսազրույցների մասին. նոր մանրամասներ «Կամազ»-ի վթարից. ԼՈւՐԵՐ

• ԱՄՆ Պետքարտուղարության փոխխոսնակ Վեդանտ Պատելը ճեպազրույցում անդրադարձել է պետքարտուղար Էնթոնի Բլինքենի ՝Հայաստանի և Ադրբեջանի ղեկավարների հետ վերջին հեռախոսազրույցներին. «Այս հարցում պետքարտուղարի շարունակական ներգրավվածությունը Հարավային Կովկասի տարածաշրջանի խաղաղ ապագան խթանելու Միացյալ Նահանգների հանձնառության ուղղակի արդյունքն է: Մենք հավատում ենք, որ ուղղակի երկխոսությունն առանցքային է այս խնդրի լուծման համար, դրա համար էլ մենք շարունակում ենք խորապես ներգրավված մնալ այս հարցում»,- ասել է նա։
• Ալեն Սիմոնյանը վրացի գործընկերոջ հետ լրագրողներին ներկայացրել է հանդիպման մանրամասները. «Մենք քննարկեցինք երկկողմ համագործակցության ամենատարբեր ոլորտներ՝ կրթություն, մշակույթ, տրանսպորտ, կապ եւ այլն: Քննարկեցինք ենթակառուցվածքային ծրագրերի վերաբերյալ հարցերը, որոնք միտված են ապահովելու տրանսպորտային եւ հաղորդակցության միջազգային նախագծերում անհրաժեշտ ներգրավվածությունը»,- ասել է ՀՀ ԱԺ նախագահը:
• «Կամազ»-ի կողաշրջվելու դեպքի առնչությամբ Քննչական կոմիտում քրեական վարույթ է նախաձեռնվել։ Նախնական տեղեկություններով, ՀՀ ՊՆ N զորամասի պարտադիր ժամկետային զինծառայողը իր կողմից վարած «Կամազ» մակնիշի ավտոմեքենայով, անձնակազմին զորամասից կրակային դիրք տեղափոխելու ճանապարհին, խախտել է տրանսպորտային մեքենա վարելու կանոնը, որի արդյունքում մեքենան կողաշրջվել է, ինչի հետևանքով զինծառայողներից մեկը ստացած մարմնական վնասվածքներից մահացել է, իսկ մյուսները ստացել են տարբեր մարմնական վնասվածքներ և տեղափոխվել կայազորային զինվորական հոսպիտալ:

Այս ժամի լուրերը՝ տեսանյութում։