Քաղաքականություն
16.11.2022 | 21:32Արևմուտքը ԼՂ-ի հարցով առաջարկում է Ստեփանակերտ-Բաքու երկխոսություն սկսել՝ միջազգային երաշխիքներով, և խոսել ԼՂ ժողովրդի անվտանգության և իրավունքների ապահովման հարցերի շուրջ։ Մինչդեռ Ֆրանսիային ուղղված իր սպառնալիք-հայտարարության մեջ Բաքուն նշել է․ «Այդ տարածաշրջանում ապրող հայ բնակչության իրավունքներն ու անվտանգությունը Ադրբեջանի ներքին հարցն են և ապահովվելու են Ադրբեջանի սահմանադրության դրույթներին համապատասխան»։
Կա՞ սցենար, որ Բաքվի այս ապակառուցողականությունը շրջվի իր դեմ։ Քաղաքական վերլուծաբան Արմեն Հովհաննիսյանը դա միանգամայն հավանական սցենար է համարում, հատկապես, որ Ադրբեջանի նախագահը ոչ միայն զենքով լուծված է հայտարարում ԼՂ-ի խնդիրը, ինչը չեն ընդունում ԱՄՆ-ն և Ֆրանսիան, այլև նոր պահանջներ է դնում, ինչպես, ասենք, «միջանցք» ստանալ ՀՀ-ից։
«Միջանցքի պահանջը ևս ոչ լեգիտիմ է։ Բացի ՌԴ-ն և Թուրքիան՝ ամբողջ աշխարհը սա որակում է որպես ոչ լեգիտիմ պահանջ։ Ալիևն իր այս ապակառուցողականության մեջ որևէ հաշվարկի խնդիր չունի։ Պուտինը, Էրդողանը, Ալիևը պատերազմից առաջ պայմանավորվել են, թե ինչպես են իրենք տեսնում տարածաշրջանը։ Թրամփը մասամբ էր համաձայնել՝ իրեն պետք էր Իրանի հարցի լուծումը և իսրայելական լոբբիին տրվելով՝ ինքը պատկերացնում էր, որ այդ հարավային շրջանները շատ լավ պլատֆորմ են Իրանի վրա ճնշում գործադրելու համար, բայց՝ ո՛չ Ղարաբաղը։ Նույնիսկ Թրամփն էր կողմ, որ քրիստոնյա հայերի ցեղասպանություն չլինի և նրա վարչակազմի կողմից խաղաղապահների լոբբինգը շատ ուժեղ էր։ Ալիևի ասածն է՝ ինքը հաղթել է, բայց բոլորը սահմանափակում են իրեն, չեն ընդունում իր փաստարկները, խնդիրներ են առաջացնում։ Ալիևն այս պահին իրեն համարում է խաբված։ Նա մի մարդ է, որ մի քանի հազար ադրբեջանցու է զոհաբերել և բազում ծախսեր է տեսել։ Եվ չի ստանում այն, ինչ պայմանավորվել էր Պուտինի և Էրդողանի հետ։ Պուտինն այսօր կա, վաղը չկա։ Թուրքիայում ամռանն ընտրություններ են, հայտնի չէ Էրդողանի ճակատագիրը։ Ալիևի միակ շանսը Իրանի դեմ հավանական հրահրված պատերազմում ինչ-որ դերի ստանձնումն է և որպես ծառայություններ մատուցած երկիր՝ ստանալ ինչ-որ բաներ»,- ասաց Արմեն Հովհաննիսյանը։
Հարցազրույցն ամբողջությամբ՝ տեսանյութում։
Ռոբերտ Անանյան
