18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Ստամբուլում պայթյունից հետո Էրդողանը չի բացառել Սիրիայում նոր ռազմական գործողությունը
Քաղաքականություն
16.11.2022 | 22:07
Թուրքիայի նախագահ Ռեջեփ Թայիփ Էրդողանը հայտարարել է, որ նոյեմբերի 13-ին Ստամբուլում տեղի ունեցած ահաբեկչությունից հետո հնարավոր է՝ նոր անդրսահմանային ռազմական գործողություն իրականացվի Սիրիայում, գրում է ՏԱՍՍ-ը։
«Հետաքննության ավարտից հետո կարվի այն ամենը, ինչ անհրաժեշտ է: Ողջ աշխարհը պետք է իմանա ահաբեկչության դեմ պայքարում մեր վճռականության մասին»,- ասել է Էրդողանը Բալիում G20-ի գագաթնաժողովին մասնակցելուց հետո կայացած մամուլի ասուլիսում։
Նա ավելի վաղ էլ պարբերաբար հայտարարում էր Թուրքիայի կողմից Սիրիայում նոր ռազմական գործողություն իրականացնելու մասին՝ իբրև անվտանգության գոտու ստեղծման համար։ Անկարան արդեն մի քանի անգամ ռազմական ներխուժումներ իրականացրել է Սիրիայում։
Հիշեցնենք, որ Թուրքիայի ներքին գործերի նախարար Սուլեյման Սոյլուն պայթյունի համար մեղադրել է քրդական YPG-ին և Քուրդիստանի աշխատավորական կուսակցությանը (PKK): Անկարան պնդում է, որ YPG-ն, որին Վաշինգտոնն աջակցում է Սիրիայում, PKK-ի թևն է:
Թուրքիայի ոստիկանությունը պայթյունի իրականացման համար ձերբակալել է սիրիացի կնոջ, որին մեղադրում է PKK-ի կապերի մեջ։ PKK-ն, սակայն, հերքել է իր ներգրավվածությունը պայթյունին՝ նշելով, որ չի թիրախավորում քաղաքացիական անձանց։ Ընդհանուր առմամբ, գործով ձերբակալվել է 50 մարդ։
Հավելենք, որ պայթյունի հետևանքով զոհվել է 6 մարդ, 81-ը՝ վիրավորվել։
Էմմա Չոբանյան
