Քաղաքականություն
16.11.2022 | 10:03
ՀՀ նախկին վարչապետ, Ազգային ժողովի նախկին նախագահ Հովիկ Աբրահամյանի զարմուհուն՝ Կարինե Պողոսյանին, Արարատի ՔՊ-ական մարզպետ Սեդրակ Թևոնյանը նշանակել է իր օգնական։ Այս մասին Factor.am-ը տեղեկանում է Արարատի մարզպետի ստորագրած համապատասխան որոշումից։
Նշանակումը, ըստ պաշտոնական աղբյուրի, կատարվել է 2022 թվականի հոկտեմբերի 7-ին։
Նշենք, որ Կարինե Պողոսյանը Ազգային ժողովի 5-րդ և 6-րդ գումարման պատգամավոր է եղել։ Նախ՝ Հովիկ Աբրահամյանի Աժ նախագահության շրջանում ՀՀԿ-ից, ապա՝ Աբրահամյանի՝ վարչապետի պաշտոնը կորցնելուց հետո, վերջինիս խնամի՝ Գագիկ Ծառուկյանի ղեկավարած «Ծառուկյան» խմբակցությունից։
Կարինե Պողոսյանի նշանակումն ուշագրավ է Նիկոլ Փաշինյանի կողմից Հովիկ Աբրահամյանին և նախկին իշխանության ներկայացուցիչներին ուղղված քննադատությունների համատեքստում։
Հիշեցնենք՝ հեղափոխությամբ վարչապետ դարձած Փաշինյանը նախկիններին՝ այդ թվում Հովիկ Աբրահամյանին, մեղադրում էր կոռուպցիոն ճանապարհով հարստանալու համար։ Վարչապետը նաև պնդում էր, որ Մոնումենտի բարձունքը, որտեղ երկու շքեղ առանձնատուն ունի Աբրահամյանը, «կոռուպցիայի թանգարան է՝ բաց երկնքի տակ» և առաջարկում էր այդ «թանգարանի ցուցանմուշները ժողովրդին վերադարձնելուց հետո Աբրահամյանին դարձնել այդ թանգարանի գիդ»։
Մոնումենտի բարձունքի շքեղ առանձնատունը, սակայն, ամիսներ առաջ 5,1 ԱՄն դոլարին համարժեք դրամով անարգել վաճառվեց նորահայտ գործարար Նարեկ Նալբանդյանին՝ անկախ այն փաստից, որ հարուցված քրեական գործի շրջանակներում առանձնատան վրա կալանք էր դրված։ Այս կապակցությամբ նախկին գլխավոր դատախազը Factor.TV-ի հարցին ի պատասխան հայտնեց, որ ինքը տարակուսած է այս որոշումից։
Թե կոնկրետ որ հարցերում է Հովիկ Աբրահամյանի զարմուհին օգնելու Արարատի մարզպետին, հայտնի չէ։
Նշենք, որ Կարինե Պողոսյանը ավարտել է Խ.Աբովյանի անվան հայկական պետական մանկավարժական ինստիտուտի ֆիզիկամաթեմատիկական ֆակուլտետը, ապա աշխատել Արտաշատի թիվ 1 դպրոցում․ սկզբում որպես ֆիզիկայի ուսուցչուհի, ապա՝ տնօրեն։
Նարեկ Կիրակոսյան
