18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Իրանի ԱԳՆ-ն արձագանքել է Ալիևի մեղադրանքներին
Քաղաքականություն
09.11.2022 | 13:27
Իրանի ԱԳՆ խոսնակ Նասեր Քանանին հայտարարել է, որ Կովկասի խնդիրների լուծման ճանապարհն անցնում է տարածաշրջանի երկրների մայրաքաղաքներով, այլ ոչ թե արտատարածաշրջանային ուժերին դիմելու ճանապարհով, գրում է Մեհր գործակալությունը։
Նա նշել է, որ Իսլամական Հանրապետությունը միշտ շեշտը դրել է հարևանների՝ միմյանց տարածքային ամբողջականությունը հարգելու անհրաժեշտության վրա։ Քանանին նշել է, որ Իրանը դատապարտել է «Ադրբեջանի տարածքների օկուպացիան» և աջակցել խաղաղ լուծմանը Կովկասի երկրների միջև միջազգային իրավունքին համապատասխան։
Պաշտոնյան հավելել է, որ Թեհրանը ևս մեկ անգամ հայտարարում է իր պատրաստակամության մասին՝ օգնելու լուծել Հայաստանի ու Ադրբեջանի միջև խնդիրները տարբեր ձևաչափերում, այդ թվում՝ երկկողմ, եռակողմ, ինչպես նաև 3+3 ձևաչափի համագործակցության մեխանիզմով։
Քանանին նաև պատասխանել է Ադրբեջանի նախագահ Իլհամ Ալիևի ավելի վաղ արած հայտարարություններին, որոնցով նա դժգոհություն էր հայտնել Իրանի և Հայաստանի պաշտոնյաների միջև վերջին հանդիպումների կապակցությամբ՝ Թեհրանին մեղադրելով Երևանին չափազանց մեծ աջակցություն ցուցաբերելու մեջ։
«Մեր սկզբունքային քաղաքականությունը հիմնված է բարիդրացիության և բոլոր հարևանների հետ հարաբերությունների ընդլայնման վրա»,- ասել է Քանանին՝ նշելով, որ Իրանը երբեք չի ամրապնդում իր կապերը մի հարևանի հետ՝ ի վնաս մյուսի։
ԱԳՆ խոսնակն ասել է, որ արդեն մոտ երկու տարի է, ինչ Ադրբեջանի պաշտոնյաները տարբեր քաղաքական, ռազմական և անվտանգության մակարդակներում կապի մեջ են Հայաստանի տարբեր պաշտոնյաների հետ՝ ճանապարհ հարթելով դեպի խաղաղություն և բարեկամություն, ինչին աջակցել է Թեհրանը։ Սակայն Իրանի համար համար անհասկանալի է նրանց անհանգստության պատճառը Երևանի հետ բարիդրացիական մակարդակով բնական շփումների վերաբերյալ։
Քանանին նաև հայտնել է, որ Հայաստանի ու Ադրբեջանի սահմանների երկայնքով Իրանի վերջին զորավարժությունները նախապես ծրագրված են եղել, որի մասին ավելի վաղ տեղեկացվել է պաշտոնական ուղիներով։
Հիշեցնենք, որ նախօրեին Ադրբեջանի նախագահ Իլհամ Ալիևը նշել էր, որ որևէ իրանական զորավարժությունները «իրենց չի վախեցնում»։
«Մեր բանակը հերոսություն, պրոֆեսիոնալիզմ, նվիրում է ցուցաբերել։ Եթե պետք լինի, կհասնենք նրան, ինչին ցանկանում ենք, դա գիտեն բոլորը, և թող իմանան բոլորը, ովքեր զորավարժություններ են անցկացնում մեր սահմանին՝ ի աջակցություն Հայաստանի»,-ասել էր նա։
Էմմա Չոբանյան
