06.07.2026 | 11:39
Վարորդական իրավունքի վերականգնման դիմումներ և վկայականների տրամադրման կարգում փոփոխություններ. ՈՒՂԻՂ
2023-ի հուլիսից նվազագույն կենսաթոշակը կդառնա 36 հազար դրամ՝ ներկայիս 31 հազարի փոխարեն․ ՏԵՍԱՆՅՈՒԹ
Հասարակություն
04.11.2022 | 12:02
Ընթանում է Ազգային ժողովի աշխատանքի և սոցիալական հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստը։
2023 թվականի հուլիսից նախատեսվում է բարձրացնել կենսաթոշակները՝ նվազագույն դրույք սահմանելով 36000 դրամը՝ ներկայիս 31600 դրամի նկատմամբ: Այս մասին հայտնեց ՀՀ աշխատանքի և սոցիալական հարցերի նախարար Նարեկ Մկրտչյանը:
Նախատեսվում նաև կենսաթոշակային քաղաքականության ռեֆորմի շրջանակներում ներդնել նոր գաղափար:
«Կենսաթոշակային տարիք մուտք գործող այն քաղաքացիները, ովքեր ունեն կայուն, բավարար եկամուտ կամ կենսապահովություն, կամավորության սկզբունքով կկարողանան 1-2 կամ ավել տարի ժամկետով կենսաթոշակ չստանալու դիմաց հետագայում ցմահ ստանալ ավելի բարձր կենսաթոշակ, քան նախատեսված է օրենքով, յուրաքանչյուր տարվա դիմաց որոշակի տոկոսային հավելման դիմաց սկզբունքով»,- ասաց նախարարը:
Ըստ Մկրտչյանի՝ սա հնարավորություն կտա հատկապես միջինից բարձր աշխատավարձ ստացող կենսաթոշակառուներին պլանավորել իրենց ծերությունն ավելի բարենպաստ պայմաններով:
«Ներկայումս շուրջ 32 հազար կենսաթոշակառու ստանում է ամսական 150 հազար դրամից բարձր աշխատավարձ: Իսկ ավելի քան 9 հազար կենսաթոշակառու ամսական ստանում է 300 հազար դրամից բարձր աշխատավարձ»,- նշեց նախարարը:
Մկրտչյանն ընդգծեց, որ 2023 թվականին նախատեսվում է շարունակել անկանխիկ եղանակով վճարումներից կենսաթոշակառուներին հետվճար տրամադրելու պետություն-մասնավոր սոցիալական փոխգործակցության միջոցառումը: Նախարարի խոսքով՝ ծրագիրը դրական արդյունքներ է արձանագրում:
«Մեկնարկի պահից յուրաքանչյուր ամիս աճում է կենսաթոշակային քարտերով ու անկանխիկ շրջանառությունը, շահառուների թիվը, հետվճարի ծավալները: Եթե հուլիս ամսին անկանխիկ վճարումներով կենսաթոշակառուների և սոցիալական նպաստառուների բանկային քարտերով կանխիկ վճարները զրոյական էին, ապա սեպտեմբեր ամսվա տվյալներով՝ 1 միլիարդ 400 միլիոն դրամ անկանխիկ շրջանառություն ունենք, որից 1 միլիարդ 200 միլիոնը վերադարձվող է»,- նշեց նախարարը՝ հավելելով, որ հոկտեմբերն ամփոփման փուլում է, ակնկալվում է, որ հոկտեմբերի տվյալները ևս աճ արձանագրած կլինեն:
Մանրամասները՝ տեսանյութում։
