17.08.2026 | 23:08
Զորականում և Ամասիայում շչակներ են փորձարկվելու
Պուտինի ակնարկն ու Փաշինյանի պատասխանը. ո՞ւմ օրակարգով են կողմերը բանակցելու Սոչիում․ ՏԵՍԱՆՅՈւԹ
Քաղաքականություն
28.10.2022 | 20:30
Հայաստանը պատրաստ է աշխատել Հայաստանի և Ադրբեջանի միջև միջազգային հարաբերությունների հաստատման՝ Ռուսաստանի ներկայացրած հիմնական սկզբունքների և պարամետրերի շուրջ։ Արձագանքելով ՌԴ նախագահ Վլադիմիր Պուտինի՝ երեկ արած հայտարարությանը՝ Թվիթերում գրել է վարչապետ Նիկոլ Փաշինյանը։ Նա հույս է հայտնել, որ Ռուսաստանը կաջակցի իր իսկ առաջարկներին։
Սոչիում հոկտեմբերի 31-ին սպասվող Փաշինյան-Ալիև-Պուտին եռակողմ հանդիպմանն ընդառաջ՝ Ռուսաստանի նախագահը երեկ ասել էր, թե Հայաստանն ուզում է ընտրել հայ-ադրբեջանական հարաբերությունների կարգավորման «վաշինգտոնյան» տարբերակը։
Փաշինյանը, մինչդեռ, թվիթերյան գրառմամբ հայտնել է, որ Հայաստանը դեռ սեպտեմբերի սկզբին է համաձայնել աշխատել ռուսական առաջարկների շուրջ։ Թե որոնք են Ռուսաստանի և Արևմուտքի առաջարկները, իշխանությունից մանրամասներ չեն ներկայացնում, բայց և ընդգծում են՝ դրանցում որևէ անընդունելի բան հայկական կողմի համար չկա։ Ըստ Հայաստանի իշխանությունների՝ Ադրբեջանն է հրաժարվում քննարկել Ռուսաստանի առաջարկները։
Մինչև այժմ որևէ պաշտոնական պարզաբանում չկա այն մասին, թե ինչ են Հայաստանին առաջարկում Արևմուտքն ու Ռուսաստանը։ Այս փաստը քաղաքագետ Գարիկ Քեռյանը խնդրահարույց է համարում և շեշտում՝ նման իրավիճակում վերլուծություններ անել և ասել, թե ո՞ր կողմի առաջարկներն են Հայաստանին, ձեռնտու դժվար է։
Այդուհանդերձ, եթե ոչ պաշտոնական հրապարակումները հիմք ընդունվեն, ապա, ըստ Քեռյանի, Հայաստանի համար առավել ցանկալի են ռուսական առաջարկները։
Ռուսաստանի առաջարկներն ընդունելի են նաև Արցախի համար։ Ստեփանակերտից պնդում են, թե դրանցում հստակ նշված է՝ կա Արցախի հարցը, որը պետք է լուծում ստանա։ Հայաստանի իշխանությունը, մինդեռ, վերջին շրջանում հայտարարում է՝ Հայաստան-Ադրբեջան խաղաղության օրակարգում Արցախի մասին խոսք պետք է չլինի։ Ստեփանակերտից ևս անհանգստացած են՝ եթե Հայաստանը շարժվի «վաշինգտոնյան» օրակարգով, ապա Արցախի հարցը վերջնակապես կփակվի։
Գարիկ Քեռյանի համոզմամբ՝ Հայաստանի համար կարևոր է, որ Ղարաբաղը մնա հայկական, իսկ կարգավիճակի շուրջ ապագայում լինեն բանակցություններ։
Իշխանական պատգամավոր Արմեն Խաչատրյանն իր հերթին հիշեցնում է՝ Ռուսաստանի միջնորդությամբ ցանկացած պայմանավորվածություն և փաստաթուղթ հետագայում Ադրբեջանը խախտում է, և դա որևէ հետևանք չի ունենում։
Այս ֆոնին այսօր Կրեմլը հաստատեց՝ ռուսական կողմի նախաձեռնությամբ հոկտեմբերի 31-ին Սոչիում տեղի կունենան եռակողմ բանակցություններ Հայաստանի, Ադրբեջանի և Ռուսաստանի ղեկավարների միջև։
Մանրամասները՝ տեսանյութում։
Շողիկ Գալստյան
