ՀՀ-ից որքան տարածք է օկուպացրել Ադրբեջանը․ Փաշինյանի և թիմակիցների ներկայացրած թվերը տարբեր են․ ՏԵՍԱՆՅՈՒԹ

Սեպտեմբերի 13-ին սանձազերծած ագրեսիայի հետևանքով Ադրբեջանը Հայաստանի ինքնիշխան տարածքից օկուպացրել է մոտ 60 քառակուսի կիլոմետր տարածք: Այս մասին այսօր հայտնեց ՀՀ ԱԺ Պաշտպանության և անվտանգության հարցերի մշտական հանձնաժողովի իշխանական անդամ Գագիկ Մելքոնյանը:

Մինչ պատգամավորն այս թվերն էր ներկայացնում, հանձնաժողովի փոխնախագահ Արմեն Խաչատրյանը Սանկտ Պետերբուրգում՝ ՀԱՊԿ անդամ պետությունների խորհրդարանների խորհրդակցության ընթացքում առաջին անգամ հայտարարել է, որ Ադրբեջանը 2021-22 թվականների ընթացքում Հայաստանի ինքնիշխան տարածքից, ընդհանուր առմամբ, գրավել է 127 քառակուսի կիլոմետր տարածք:

Ուշագրավ է, որ ադրբեջանական հարձակումից մեկ օր անց՝ սեպտմեբերի 14-ին, խորհրդարանում վարչապետ Նիկոլ Փաշինյանը հայտարարել էր, թե սեպտեմբերի 13-ի հարձակման հետևանքով հակառակորդը Հայաստանի տարածքից գրավվել է 10 քառակուսի կիլոմետր տարածք: Թե ինչպես է ստացվել, որ բուն ռազմական գործողություններից մեկ օր հետո վարչապետի ներկայացրած այս թիվը առնվազն մի քանի անգամ պակաս է իշխանական պատգամավորների ներկայացրած թվերից, պարզ չէ: Իշխանական պատգամավորներն այս առնչությամբ այդպես էլ հստակ պարզաբանումներ չեն ներկայացում:

Պաշտպանության նախկին նախարար, «Հայաստան» խմբակցության ղեկավար Սեյրան Օհանյանը չի հավատում, որ իշխանությունը ճշգրտված տվյալներ կհայտնի: Թե քանի դիրք է գրավել հակառակորդը, իշխանական պատգամավոր Գագիկ Մելքոնյանն ասում է՝ տեղյակ չէ, բայց հայտարարում է՝ կան դիրքային կորուստներ, առաջնագիծն էլ փոխվել է:

44-օրյա պատերազմից երկու տարի անց հայկական կողմը պատշաճ չի կահավորել դիրքերը և չեն իրականացվել անհրաժեշտ ինժեներական աշխատանքներ, պնդում է պաշտպանության նախկին նախարար Սեյրան Օհանյանը:

Պաշտպանության նախարարությունից դիրքային կորուստների հետ կապված մեր հարցերին ի պատասխան՝ նախարարության մամուլի խոսնակը խնդրեց գրավոր հարցում ուղարկել:

Մանրամասները՝ տեսանյութում։

Շողիկ Գալստյան