Նման հապշտապ որոշումը նույնքան վտանգավոր է, որքան սահմանին տիրող իրավիճակը. Դիլբարյանը` բուհերի միավորման մասին. ՏԵՍԱՆՅՈՒԹ

«ԿԳՄՍՆ-ից ասում են` Բրյուսովում միայն երկու ռեկտոր է կրճատվելու. դա ճիշտ չէ´, համատեղում չի կատարվելու, շատ կրճատումներ են լինելու: Նման հապշտապ, ոչ համակարգային փոփոխությունը նույնքան վտանգավոր է, որքան սահմանին տիրող իրավիճակը: Բրյուսովում, օրինակ, կան նեղ ոլորտային ամբիոններ. դրանք ի՞նչ կարգավիճակում են հայտնվելու, կամ` ինչպե՞ս է կատարվելու ներդաշնակումը Ֆիզկուլտինստիտուտի հետ. չէ՞ որ այնտեղ պատրաստում են պրոֆեսիոնալ մարզիկների, ինչպե՞ս են բոլորին մեկ կաթսայի մեջ խառնելու»,- Factor TV-ի հետ զրույցում նման տեսակետ է հայտնում ԵՊՀ դոցենտ, լեզվաբան Նարինե Դիլբարյանը` անդրադառնալով Բրյուսովի պետական համալսարանի, Ֆիզկուլտինստիտուտի և Մանկավարժական համալսարանի` ԿԳՄՍ նախարարությունում շրջանառվող նախագծին:

Նա անդրադառնում է Մանկավարժական համալսարանի այն հայտարարությանը, թե վերջինս պատրաստակամ է իր ներուժով աջակցել բուհերի միավորման գործընթացին.

«Ինձ համար տխրեցնող էր Մանկավարժականի խիստ ճեպընթաց համաձայնությունը: Զարմացած եմ, որ բուհը շտապել է ողջունել ծրագիրը` չունենալով դրա հիմնավորումները»:

Նրա խոսքով` Կրթության և գիտության, մշակույթի, սպորտի նախարարությունների միավորումը կարծես դարձավ վատ նախադեպ բուհերի միավորման համար, արդյունքում տուժում է այդ կառույցների արդյունավետ կառավարումը:

Նարինե Դիլբարյանը խոսում է նաև կառավարությանն ուղղված այն մեղադրանքներից, թե բուհերի շենքերի հետ կապված հեռահար բիզնես-ծրագրեր կան. «Ակնհայտ է, որ երբ բուհերը տեղափոխվեն ակադեմիական քաղաք, բուհերի շատ շենքեր կարող են գրավիչ լինել այդպիսի նպատակների համար, բայց կրթության ոլորտում շենքը միայն կացարան չէ, այն նաև միջավայր է, պատմություն է: Հայրենիքը, սարը, փողոցը, տունը դարձել են լոկ բիզնես առարկա: Զարմացած եմ, որ կարող են լինել մարդիկ, որոնք աչք ունեն այդ շենքերի վրա նման քաղքենիական կիրառման նպատակով»:

Մանրամասները` տեսանյութում:

Աննա Բաբաջանյան