Թրամփը միտումնավոր կեղծ տեղեկություններ է հայտնել ընտրություններում հնարավոր կեղծիքների մասին

ԱՄՆ-ի նախկին նախագահ Դոնալդ Թրամփը միտումնավոր խեղաթյուրել է 2020 թվականի նախագահական ընտրություններում հնարավոր կեղծիքների մասին տվյալները։ Այս մասին ասված է Կալիֆորնիայի շրջանային դատարանի դատավոր Դեյվիդ Քարթերի՝ չորեքշաբթի՝ հոկտեմբերի 19-ին հրապարակված որոշման մեջ։ Դատարանը Սպիտակ տան նախկին ղեկավար Ջոն Իսթմանի փաստաբանից պահանջում է մինչև հոկտեմբերի 28-ը էլեկտրոնային նամակագրություն տրամադրել Թրամփի հետ ԱՄՆ Կոնգրեսի Ներկայացուցիչների պալատի հանձնաժողովին, որը հետաքննում է Կապիտոլիումի գրոհը, գրում է DW-ի ռուսական ծառայությունը։

2020 թվականի նոյեմբերին կայացած նախագահական ընտրություններից հետո, որոնցում հաղթել է դեմոկրատ Ջոզեֆ Բայդենը, Թրամփը և նրա համախոհները տասնյակ հայցեր են ներկայացրել քվեարկության ժամանակ ենթադրյալ զանգվածային խախտումների վերաբերյալ։ Մասնավորապես, Ջորջիա նահանգում ներկայացված հայցում, որը վկայակոչում է Կալիֆորնիայի դատավորը, Սպիտակ տան ղեկավարի փաստաբանները, ի թիվս այլ հարցերի, պնդում են, որ շրջաններից մեկում հաշվվել է 10 315 մահացածի ձայն: Ավելի ուշ Իսթմանը նամակում գրել է, որ Թրամփին տեղեկացրել են, որ իրեն տրամադրված որոշ տեղեկություններ սխալ են: Այնուամենայնիվ, նախագահը և նրա փաստաբանները, ի վերջո, նույն սխալ թվերով հայց են ներկայացրել, և Թրամփը երդվել է, որ ինչքանով ինքը գիտի, բոլոր տեղեկությունները ճիշտ են, նշվում է դատավոր Քարթերի հրամանում:

«Էլեկտրոնային նամակները ցույց են տալիս, որ նախագահ Թրամփը գիտեր, որ ընտրակեղծիքների վերաբերյալ կոնկրետ տվյալները սխալ են, բայց շարունակել է դրանք տարածել ինչպես դատական փաստաթղթերում, այնպես էլ հանրության շրջանում», – ընդգծում է Կալիֆորնիայի դատարանը:

Հիշեցնենք, որ Կապիտոլիումի գրոհը տեղի է ունեցել 2021 թվականի հունվարի 6-ին Թրամփի կողմնակիցների հանրահավաքի ժամանակ, որոնք չէին ճանաչել քվեարկության արդյունքները։ Բողոքի ցույցերը հանգեցրել էին ոստիկանության հետ լայնամասշտաբ բախումների։ Հարձակման էր ենթարկվել 140 ոստիկան, 5 մարդ մահացել էր։

Տաթև Ֆռանգյան