31.10.2026 | 22:55
Հայտնաբերվել է զինծառայողի դի. ՊՆ
Պետությունը 200 նոր ավտոմեքենա կգնի․ Նիկոլ Փաշինյանը հանձնարարել է ծառայողական հին մեքենաները նորերով փոխարինել
Քաղաքականություն
19.10.2022 | 21:56
ՀՀ պետական կառույցները ծառայողական նոր ավտոմեքենաներ կգնեն՝ վաճառելով հինը։ Նիկոլ Փաշինյանը պետական ավտոպարկը թարմացնելու հանձնարարական է տվել։ Այս մասին Factor.am-ը տեղեկանում է հրապարակված Կառավարության որոշման նախագծից։
Նախատեսվում է շուրջ 200 էկոնոմ դասի ներքին այրման շարժիչով ավտոմեքենաներ և էլեկտրոմոբիլներ գնել։
«Նախատեսվում է տրանսպորտային միջոցների ձեռք բերման գործընթացում նախապատվությունը տալ էլեկտրոմոբիլներին՝ հաշվի առնելով այն հանգամանքը, որ դրանց ձեռք բերման արդյունքում կկրճատվեն տրանսպորտային միջոցների պահպանման ծախսերը (վառելիք, երաշխիքային սպասարկում և այլ ծախսեր) և կմեղմացվի բացասական ազդեցությունը շրջակա միջավայրի վրա՝ ի հաշիվ վերականգնվող բնական ռեսուրսների օգտագործման։ Ավելին՝ նոր տրանսպորտային միջոցների ձեռք բերման գործընթացը կապահովի ՀՀ պետական կառավարման մարմիններին սպասարկող մեքենաների թվաքանակի զգալի կրճատում»,- ասված է որոշման նախագծի հիմնավորման բաժնում։
Միաժամանակ, նշվում է, որ հին ավտոմեքենաները, որոնց թիվը 600 է, վաճառքի կհանվեն, գումարները կուղղվեն պետական բյուջե։
Նշենք, որ նախագծում հստակեցված չեն, թե ո՞ր գերատեսչությունների մեքենաներն են փոխարինվելու նորերով և պետբյուջեից որքա՞ն գումար է ծախսվելու նոր ավտոմեքենաների համար։
Նարեկ Կիրակոսյան
