Ռուսաստանի կողմից Իրանի օգնությանը դիմելը նշանակում է սեփական սնանկության ճանաչում․ Զելենսկի

«Այն փաստը, որ Ռուսաստանը դիմել է Իրանին օգնության համար, Կրեմլի կողմից իր ռազմաքաղաքական սնանկության ճանաչումն է», – ասել է Ուկրաինայի նախագահ Վլադիմիր Զելենսկին իր երեկոյան տեսաուղերձում։ «Տասնամյակներ շարունակ նրանք միլիարդավոր դոլարներ են ծախսել իրենց ռազմարդյունաբերական համալիրի վրա,  բայց, ի վերջո, նրանք խոնարհվել են Թեհրանի առաջ՝ բավականին պարզ անօդաչու թռչող սարքեր և հրթիռներ ստանալու համար»:

Նա նշել է, որ իրանական զենքը չի օգնի Ռուսաստանի ղեկավարությանը Ուկրաինայում իր ծրագրերն իրականացնելու հարցում։
«Ռազմավարական առումով դա նրանց ոչ մի կերպ չի օգնի: Բայց հիմա, տակտիկական մակարդակում, ահաբեկիչները կարող են դեռ որոշակի հույսեր ունենալ, ինչ-որ հաշվարկներ: Այս ամենը կփլուզվի, ինչպես նրանց նախկին հաշվարկները»:

Զելենսկին միաժամանակ ուկրաինացիներին հորդորել է նվազեցնել էլեկտրաէներգիայի սպառումը հատկապես պիկ ժամերին։ Ավելի վաղ Ուկրաինայի նախագահը հայտարարել էր, որ ռուսական հարվածների հետևանքով երկրում էլեկտրակայանների գրեթե մեկ երրորդը դադարել է աշխատել։

Երեկոյան ելույթում Զելենսկին անդրադարձել է նաև վերջերս Ուկրաինա մատակարարված գերմանական IRIS-T հակաօդային պաշտպանության համակարգի աշխատանքին։

«Շնորհակալություն նաև մեր գործընկերներին՝ բոլորին, ովքեր օգնում են մեզ հակաօդային և հակահրթիռային պաշտպանության հարցում: Օրինակ, գերմանական IRIS-T-ն իրեն շատ լավ դրսևորեց. դա իսկապես արդյունավետ համակարգ է»,- ասել է նախագահը։

Ավելի վաղ Ուկրաինայի զինված ուժերը հայտարարել էին, որ գերմանական առաջին IRIS-T համակարգն աշխատում է հարավային ուղղությամբ։ Հետագայում Գերմանիան մտադիր է Ուկրաինային փոխանցել ևս երեք նման համալիր։