31.10.2026 | 22:55
Հայտնաբերվել է զինծառայողի դի. ՊՆ
Հայաստանի դեմ Ադրբեջանի վերջին ագրեսիայից հետո 29 անհետ կորած հայ կա․ Փաշինյան
Քաղաքականություն
19.10.2022 | 10:24
ՀՀ վարչապետ Նիկոլ Փաշինյանը թվիթերի իր միկրոբլոգում արված գրառմամբ անդրադարձել է ղարաբաղյան առաջին պատերազմից մինչև վերջին ագրեսիայի ընթացքում անհետ կորածների խնդրին ու հույս հայտնել, որ Ադրբեջանը կհամագործակցի մեր հայրենակիցների ճակատագիրը ճշտելու հարցում։
«Կան 777 անհետ կորած հայեր Լեռնային Ղարաբաղի 1-ին պատերազմից, 217 անհետ կորած ՝ ԼՂ 2-րդ պատերազմից, և 29-ը ՝ սեպտեմբերի 13-ին Հայաստանի դեմ Ադրբեջանի ագրեսիայից։ Հուսով ենք, որ Ադրբեջանը կհամագործակցի մեր հայրենակիցների ճակատագիրը ճշտելու հարցում»,- գրել է վարչապետը։
Հիշեցնենք, որ վարչապետ Փաշինյանը Ղազախստանի մայրաքաղաք Աստանայում կայացած ԱՊՀ պետությունների ղեկավարների խորհրդի նիստին ելույթ ունենալիս անդրադարձել էր Իլհամ Ալիևի կողմից Ադրբեջանի անհետ կորած քաղաքացիների մասին շահարկումներին՝ նշելով․ «Այժմ, քարտեզները ստանալուց հետո, Ադրբեջանը փորձում է ռազմագերիների, գերիների և այլ պահվող անձանց վերադարձը պայմանավորել ԼՂ առաջին պատերազմի հետևանքով անհայտ կորածների ճակատագրի պարզաբանմամբ։
․․․Այս տարեսկզբի մեր հանդիպումների ժամանակ Հայաստանը պատրաստակամություն է հայտնել լիարժեք համագործակցել անհայտ կորածների խնդրի ողջ սպեկտրում և արդեն միակողմանիորեն հանձնել է գերեզմանների մի քանի քարտեզներ, իսկ 44-օրյա պատերազմից հետո՝ Լեռնային Ղարաբաղի առաջին պատերազմի՝ հարյուրավոր զոհերի աճյուններ:
Ցավոք, ադրբեջանական կողմը, որը 30 տարի մերժում էր ականազերծման կամ որևէ այլ մարդասիրական գործունեության ոլորտում համագործակցության առաջարկները, հիշել է իր անհայտ կորած քաղաքացիների կամ ականների մասին միայն Լեռնային Ղարաբաղի դեմ ագրեսիայից և այն բանից հետո, երբ ողջ քաղաքակիրթ աշխարհը սկսեց խոսել ադրբեջանցի զինվորականների կողմից կատարված ռազմական հանցագործությունների կամ Ադրբեջանում ապօրինի պատանդ պահվող հայ ռազմագերիների մասին։ Չխորանալով մանրամասների մեջ՝ միայն այս փաստն արդեն հստակ ցույց է տալիս Ադրբեջանի իրական մտադրությունները»։
