Թուրքիայի հասարակության մի մասը կարծում է, որ իրենց կենսակերպը վտանգի տակ է. հետազոտություն

Թուրքիայի բնակչության կեսը կարծում է, որ իրենց կենսակերպը վտանգի տակ է։ MetroPoll Research ընկերությունը հրապարակել է «Թուրքիայի զարկերակային սեպտեմբեր 2022» անվանումով հարցման արդյունքները։ Հարցման մասնակիցներին հարցրել են՝ արդյո՞ք իրենց ապրելակերպը վտանգված է։ Մասնակիցների շուրջ 50 տոկոսն ասել է «այո», 47,5 տոկոսը՝ «ոչ», 2,4 տոկոսն էլ ասել է՝ գաղափար չունի։

Ուսումնասիրություն է կատարվել նաև քաղաքական կուսակցությունների համախոհների մասով։ Այսպես, իշխող «Արդարություն և զարգացում» կուսակցության (AKP) աջակիցների 15,8 տոկոսը կարծում է, որ իրենց «կենսակերպը վտանգի տակ է», մինչդեռ հիմնական ընդդիմադիր Ժողովրդահանրապետական կուսակցության (CHP) ընտրողների պարագայում այս ցուցանիշը կազմում է 84,6 տոկոս, İYİ կուսակցության ընտրողների դեպքում՝ 77,3 տոկոս, քրդամետ Ժողովուրդների դեմոկրատական (HDP) կուսակցության դեպքում՝ 77.5 տոկոսը, «Ազգայնական շարժում» կուսակցության (MHP)՝ 14.3 տոկոսը, իսլամիստական «Ուրախություն» կուսակցության՝ 46.7 տոկոսը, DEVA կուսակցության համախոհների պարագայում՝ 46.2 տոկոսը:

MetroPoll-ի հիմնադիր և գործադիր տնօրեն Օզեր Սենջարը հրապարակել է հարցման արդյունքները թվիթերյան էջում ու հետևյալ գրառումն արել․ «Կարծում եմ, որ հասարակության այն հատվածը, որն աճող մտահոգություններ ունի իր ապրելակերպի վերաբերյալ, կրոնական և գլխաշորով մարդիկ չեն, որոնք պետական հատվածում են, այլ աշխարհիկ և ժամանակակից պահպանողական անհատներ: Եվ այդ մտահոգություններն աստիճանաբար ավելանում են»։

Էմմա Չոբանյան