Միջանցք չենք տալու․ նոյեմբերի 9-ի փաստաթուղթը հրապարակված է՝ գտեք այդ բառը․ Փաշինյան․ ՏԵՍԱՆՅՈՒԹ

Ինչքան էլ մենք աշխարհի ամենամեծ և ամենահզոր պետությունը չենք, բայց մեր տարածքային ամոբղջականության հարցում ընդհանուր առմամբ ուրիշների տեսակետը մեզ շատ չպետք է հետաքրքրի, մեզ պետք է հետաքրքրեն մեր տեսակետը և մեր դիրքորոշումը, որ մենք ասել ենք՝ Հայաստանի տարածքով մենք միջանցք, տարածք չենք տալու: Այս մասին այսօր Ազգային ժողովում Կառավարության հետ հարցուպատասխանի ժամանակ ասաց ՀՀ վարչապետ Նիկոլ Փաշինյանը:

«Չկա մի երկիր, որը մեզ հետ քննարկումներում խոսում է միջանցքի մասին, և եթե լինի մի երկիր, մենք այդ քննարկումը չենք անի, քանի որ ի՞նչ միջանցք, ո՞վ է հորինել այդ միջանցքը, որտե՞ղ է գրված միջանցք. Ադրբեջանն ասում է, որ 2020 թվականի նոյեմբերի 9-ի հայտարարության 9-րդ կետի համաձայն: Դա հրապարակված կետ է, ես աշխարհի բոլոր տառաճանաչ մարդկանց կոչ եմ անում գտնել «միջանցք» բառը 9-րդ կետում, արդյոք այդ փաստաթղթում կա՞ միջանցքի մասին հիշատակում: Այո՛, կա, և դա Լաչինի միջանցքն է, որը գտնվում է ռուս խաղաղապահների վերահսկողության ներքո»,- նշեց վարչապետը:

Վարչապետի խոսքով՝ այլ հարց է կոմունիկացիաների բացումը: «Մենք առաջարկությունների նոր փաթեթ ենք ներկայացրել եռակողմ աշխատանքային խմբի ֆորմատով Ադրբեջանին, և ես Բրյուսելում այդ առաջարկությունները առձեռն փոխանցել եմ Ադրբեջանի նախագահին, և որ պահին իրենք դա ընդունեն, մենք պատրաստ ենք անմիջապես անցնելու դրա իրագործմանը»,- ասաց Նիկոլ Փաշինյանը՝ նշելով, որ այդ առաջարկությունները ճանապարհներ բացելու, տալու և ստանալու մասին են:

Մանրամասները՝ տեսանյութում։