Սփյուռքից տեղափոխվածները բնակարանի գնման սերտիֆիկատով տուն կարող են ձեռք բերել միայն Արցախում

ՀՀ-ում Արցախի կառավարության օպերատիվ շտաբից երեկ Աղավնոյից տեղահանված լիբանանահայ ընտանիքին տեղեկացրել են, որ սփյուռքից տեղափոխված հայերը բնակարանի գնման սերտիֆիկատ կստանան ո՛չ թե Հայաստանում, այլ միայն Արցախում բնակարան ձեռք բերելու համար։ Այս մասին Factor.am-ին ասաց Աղավնոյից տեղահանված ընտանիքը։

«Երեկ, որ շտաբ գնացինք, մեզ ասեցին, որ որոշում կա, համաձայն որի սփյուռքից վերաբնակեցվածները սերտիֆիկատով կարող են բնակարան ձեռք բերել միայն Արցախում, բայց երբ Խանումյանը գյուղ էր եկել ասեց, որ եթե Հայաստան եք ուզում, մարզերում կարող եք ձեռք բերել, բայց Արցախում դեռ տները պատրաստ չեն, ես գնամ նորից վարձով ապրեմ տարիներով մինչև տունը սարքեն տան, բայց էդ տարիներին դուք ո՞նց կարող եք իմանալ, որ Ստեփանակերտը մնալու է։ Ժողովրդին խաբում են, ստում են, ես էլ ոչ մի բանի չեմ հավատում», – մեզ հետ զրույցում ասաց տեղահանված ընտանիքի անդամը։

Factor.am-ը կապ հաստատեց ՀՀ-ում Արցախի կառավարության օպերատիվ շտաբի Քաշաթաղի գրասենյակի պատասխանատու Հարութ Բերբերյանի հետ, որն ասաց, որ որոշումը նոր չէ, ընդունվել է ՀՀ կառավարության կողմից այս տարվա փետրվարի 17-ին, խոսքը 169Լ որոշման մասին է։

«Այո՛, նման որոշում կա, որում 3 տարանջատում կա․ մեկը՝ իրավունք է տալիս տեղահանված ընտանիքին բնակարան գնելու սերտիֆիկատից օգտվել և բնակարան ձեռք բերել Երևանում, ՀՀ-ում և Արցախում, մյուսը՝ միայն ՀՀ-ում և Արցախում, իսկ 3-ը՝ միայն Արցախում։ 3-րդը վերաբերում է տեղահանված այն ընտանիքներին, որոնք Արցախի առանձին շրջաններից կամ այլ երկրներից տեղափոխվել և վերաբնակեցվել են Արցախի շրջաններում։ Որքանո՞վ է օրենքը խնդրահարույց, կլինե՞ն դրանում փոփոխություններ, թե՞ ոչ, չեմ կարող ասել», – ասաց Բերբերյանը։

Մեր հարցին, թե ինչու՞ է Հայկ Խանումյանը ասել, որ բոլորն էլ կարող են Հայաստանում տուն ձեռք բերել, արդյո՞ք տեղյակ չի եղել որոշման մասին, Բերբերյանը չպատասխանեց։

Սաթենիկ Հայրապետյան