07.10.2026 | 23:48
Արթուր Դանիելյանը կալանավորվեց
Շիրակի մարզի 8 դպրոց առաջին դասարան չունի
Հասարակություն
05.09.2022 | 22:19
Շիրակի մարզում, նախնական տվյալներով, այս ուսումնական տարում առաջին դասարանցիների թիվը 2978 է։ Մարզի մի քանի բնակավայրերում, սակայն, առաջին զանգ չի հնչել․ առաջին դասարանցիներ չունեն Անի կայարանի, Լեռնուտի, Գտաշենի, Շաղիկի, Սարագյուղի , Զարիշատի, Կաքավասարի, Ծաղկուտի դպրոցները, Factor.am-ին տեղեկացրին Շիրակի մարզպետարանի տեղեկատվության և հասարակայնության հետ կապերի բաժնից։
Մարզի 18 դպրոցներում առաջին դասարանցիների թիվը չի գերազանցում 3-ը։ Ալվարը, Աղվորիկը, Հովիտը, Արտենիսը, Ջրաձորը, Ձորաշենը ընդամենը մեկակական նոր աշակերտ ունեն, Կրաշենը, Փոքրաշենը, Սիզավետը, Թավշուտը, Ջաջուռ կայարանը, Զորակերտը, Հողմիկը՝ երկուական, Նոր Ախուրյանը, Կարմրավանը, Ղարիբջանյանը, Հայկասարը, Հովտունը՝ երեքական։
Շիրակի մարզից բուհերի ընդունելությանը հայտագրվել է 1128 դիմորդ, ընդունվել՝ 833-ը /78,3%/, որոնցից 213-ը /18,7%/՝ առաջին անվճար հայտով։
Շիրակցի դիմորդների գերակշիռ մասը դիմել է Շիրակի պետական համալսարան՝ 271 դիմորդ է հայտագրվել, ԵՊՀ-ում հայտագրվել է 166-ը, Հայաստանի պետական տնտեսագիտական համալսանի Գյումրու մասնաճյուղում՝ 154-ը, Երևանի պետական բժշկական համալսարանում՝ 100-ը, ՀԱՊՀ-ում (Գյումրի)՝ 73-ը։
Շիրակի մարզի դիմորդների շրջանում ամենապահանջված մասնագիտությունների տասնյակում առաջինը բուժական գործն է, այնուհետև՝ ֆինանսներ, կառավարում, ֆիզիկական դաստիարակություն և սպորտային մարզումներ, հոգեբանություն, շուկայագիտություն, անգլերեն լեզու և գրականություն, ինֆորմատիկա և կիրառական մաթեմատիկա, հաշվապահական հաշվառում և հարկում, սերվիս։
Ըստ Շիրակի մարզպետարանից ստացված տվյալների, շիրակցի դիմորդները ամենաբարձր միավորներ ստացել են անգլերենից․ 88 դիմորդ ստացել է 18-20 միավոր։ Երկրորդ ամենաբարձր ցուցանիշը հայոց լեզվից է․ 57 դիմորդ ստացել է 18-20 միավոր, մաթեմատիկա առարկայից էլ 18-20 միավոր վաստակել է 40 դիմորդ։
Այս երեք առարկաներից էլ քննության ամենամեծաթիվ մասնակիցները եղել են Շիրակի մարզից։
«Եթե անգլերեն լեզվից 465 դիմորդ է քննություն հանձնել, ապա դրան հակառակ շատ քիչ են եղել աշխարհագրություն և ֆրանսերեն առարկաներից քննություն հանձնելու հայտագրվածների թիվը, համապատասխանաբար՝ 11 և 6», -ասացին մարզպետարանից։
Արմիկ Մովսիսյան
