06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Նիկոլ Փաշինյանի ձերբակալումից մեկ ամիս անց․ թավշյա հեղափոխության ամենաբեկումնային օրը վերհիշելիս. ՏԵՍԱՆՅՈՒԹ
Քաղաքականություն
22.05.2018 | 19:40
Մեկ ամիս առաջ՝ հենց այս օրը ամենաճակատագրականը դարձավ թավշյա հեղափոխության ընթացքի համար․ առավոտյան Սերժ Սարգսյան-Նիկոլ Փաշինյան բանակցությունները ձախողվեցին, քանի որ Սերժ Սարգսյանը հանդիպումից րոպեներ անց լքեց դահլիճը։
Կարճ ժամանակ անց՝ Էրեբունի համայնքում ՀՀ ուժային կառույցների հատուկ ստորաբաժանումների դիմակավոր աշխատակիցները բերման ենթարկեցին ԱԺ պատգամավորներ Նիկոլ Փաշինյանին, Սասուն Միքայելյանին և Արարատ Միրզոյանին, ապա հատուկ միջոցներ կիրառեցին ցուցարարների նկատմամբ։ Ընդ դրում, ՀՀ ոստիկանության նախազգուշական հատարարությունը, որով ՀՀ քաղաքացիներին կոչ էր արվում ողջամիտ ժամկետում լքել հավաքի վայրը, Ոստիկանության կայքէջում տեղադրվեց 11․40, ինչից ճիշտ երկու րոպե անց՝ 11․42 սկսվեցին գործողությունները։
Մինչ այդ էլ՝ դիմակավորված մի խումբ երիտասարդներ հարձակվեցին Էրեբունի համայնքի բնակիչների վրա և նրանց դաժան ծեծի ենթարկեցին։ Արդյունքում՝ տարբեր վնասվածքներով 11 քաղաքացի տեղափոխվեց հիվանդանոց։
Նիկոլ Փաշինյանի և ԱԺ մյուս երկու պատգամավորների ձերբակալումից հետո հազարավոր քաղաքացիներ երթով ուղղվեցին դեպի Շենգավիթի ոստիկանության բաժանմունք, ապա Հանրապետության հրապարակ։ Այստեղ կայացավ մինչ այդ եղած ամենամարդաշատ հանրահավաքը, որի ընթացքում հայտարարվեց՝ «մեր առաջնորդն այստեղ չէ, մենք բոլորս առաջնորդներ ենք»։
Հաջորդ օրն առավոտյան արդեն Նիկոլ Փաշինյանը, Սասուն Միքայելյանը և Արարատ Միրզոյանը ազատ արձակվեցին։
Առաջարկում ենք վերհիշել ուղիղ մեկ ամիս առաջ այս օրը տեղի ունեցածն արձանագրած տեսանյութը։
