16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
Հովիկ Աբրահամյանի և նրա հետ փոխկապակցված 12 անձանց գույքի վրա կալանք է դրվել
Հասարակություն
05.09.2022 | 13:22
ՀՀ նախկին վարչապետ Հովիկ Աբրահամյանի և նրա հետ փոխկապակցված 12 անձանց գույքը կալանքի տակ է վերցվել. դատարանն օրեր առաջ բավարարել է ՀՀ Գլխավոր դատախազության ապօրինի ծագում ունեցող գույքի բռնագանձման գործերով վարչության դիմումը: Ինչպես Factor.am-ի հետ զրույցում նշեց Գլխավոր դատախազի խորհրդական Գոռ Աբրահամյանը՝ նախկին վարչապետն ու ընտանիքի անդամներն այսօր պետք է ներկայանային վարչություն՝ նյութերին ծանոթանալու համար։
«Հովիկ Աբրահամյանը կամ նրա հետ փոխկապակցված՝ այս գործով անցնող որևէ անձ այսօր չի ներկայացել վարչություն: Սակայն, այս հանգամանքը որևէ հավելյալ գործընթաց իրենից չի ներկայացնում, քանի որ օրենքի համաձայն՝ անձը կամ անձիք կարող են դիմում ներկայացնել և օր նշել՝ ուսումնասիրված նյութերին ծանոթանալու համար»,- նշեց Աբրահամյանը:
Հիշեցնենք՝ Մոնումենտի բարձունքում ԱԺ շենքի նմանությամբ կառուցված շքեղ առանձնատունը, որը մինչ այդ գտնվում էր կալանքի տակ, ամիսներ առաջ վաճառվեց 5 միլիոն դոլարով: Աբրահամյանների ընտանիքին պատկանող այս առանձնատունը 2018 թվականի իշխանափոխությունից հետո էր հայտնվել կալանքի տակ, քանի որ այն պաշտոնեական լիազորությունների չարաշահման գործով իրեղեն ապացույց էր համարվել: Քննության երեք տարիների ընթացքում իրավապահները ոչինչ չէին բացահայտել, իսկ 2021 թվականի նոյեմբերին Հովիկ Աբրահամյանի որդին՝ Արգամ Աբրահամյանը դիմել էր դատարան՝ պահանջելով հանել կալանքը, ինչը բավարարվել է 2022 թվականի փետրվարին: Գլխավոր դատախազությունը բողոքարկել է առաջին ատյանի դատարանի որոշումն ու դիմել վերաքննիչ դատարան, սակայն Սասուն Խաչատրյանի ղեկավարած Հակակոռուպցիոն կոմիտեի քննիչը չի սպասել վերաքննիչի որոշմանն ու արգելանքը հանել է առանձնատան վրայից:
Առանձնատան վաճառքի հետ կապված հարցերին մինչ օրս հստակ պատասխան չի հնչում ինչպես Գլխավոր դատախազությունից, այնպես էլ Հակակոռուպցիոն կոմիտեից:
Ռոզա Վարդանյան
