17.05.2026 | 23:35
Հենրիխ Մխիթարյանը՝ «Ինտեր» – «Վերոնա» հանդիպման լավագույն ֆուտբոլիստ․ ՏԵՍԱՆՅՈՒԹ
Թուրքիայի ՊՆ-ն հայտարարել է, որ Անկարան ՆԱՏՕ-ին կտեղեկացնի Հունաստանի «սադրանքների» մասին
Քաղաքականություն
31.08.2022 | 21:44
Անկարան ՆԱՏՕ-ին կտեղեկացնի Էգեյան և Միջերկրական ծովերում С-300 հակաօդային պաշտպանության համակարգերի կիրառմամբ հունական կողմի «սադրանքների» մասին։ Այս մասին հայտարարել է Թուրքիայի Ազգային պաշտպանության նախարարությունը, գրում է Anadolu-ն։
Նախարարությունը հիշեցրել է, որ Հունաստանի հակաօդային պաշտպանության համակարգերն ակտիվացվել են օգոստոսի 23-ին՝ Թուրքիայի ռազմաօդային ուժերի F-16 կործանիչներին հետապնդելու համար։ Դեպքը տեղի է ունեցել, մասնավորապես, Հռոդոս կղզու արևմուտքում։
Թուրքիայի ՊՆ-ն ընդգծել է, որ Հունաստանի գործողությունները հակասում են «դաշինքի ոգուն», ինչի կապակցությամբ ինքնաթիռների ռադարների տվյալները կփոխանցվեն ՆԱՏՕ-ի ներկայացուցիչներին։ Դեպքերի մասին կտեղեկացվեն ինչպես դաշինքի քարտուղարությունը, այնպես էլ ռազմաքաղաքական դաշինքի անդամ երկրները։
Հիշեցնենք, որ Թուրքիան ավելի վաղ հայտարարել էր, թե հունական F-16 կործանիչներն Էգեյան ծովում ՆԱՏՕ-ի NEXUS ACE ուսումնական առաքելության ժամանակ հետապնդել են երկու թուրքական F-16 կործանիչների: Իր հերթին Հունաստանի Պաշտպանության նախարարությունը հայտնել է, որ օգոստոսի 23-ին թուրքական կործանիչները Հունաստանի օդային տարածքի 78 խախտում են կատարել, ամեն անգամ նրանց որսալու համար հունական ռազմական ինքնաթիռներ են բարձրացվել։
Տաթև Ֆռանգյան
