16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
20-ամյա ծննդկանին փրկել չի հաջողվել, հայտնի է՝ ովքեր են «Սուրմալու»-ի գործով ձերբակալվածները․ Լուրեր
26.08.2022 | 17:43
- «Վանաձոր» բժշկական կենտրոնում երեկ արձանագրվել է ծննդկանի՝ 20-ամյա Մերի Մացակի Գրիգորյանի պտղի մահը, հայտնել է Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտը։ Ծայրահեղ ծանր վիճակում ծննդկանը շտապ օգնության մեքենայով ուղեկցվել է դեպի Երևան։ Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտի վերակենդանացման բաժանմունքում արձանագրվել է երիտասարդ կնոջ կենսաբանական մահը։ Փաստի առթիվ նախաձեռնվել է քրեական վարույթ «Վանաձոր» բժշկական կենտրոնի բժշկի նկատմամբ, որի անունն առայժմ չի հրապարակվում։
- Արցախը Հայաստանին կապող միջպետական մայրուղու Շուշի-Բերձոր-Գորիս ճանապարհահատվածը կգործի մինչև օգոստոսի 31-ը ներառյալ։ Նշված ժամանակահատվածում Արցախի Հանրապետություն մտնող և դեպի Հայաստանի Հանրապետություն ելք կատարող քաղաքացիների ազատ ու անվտանգ երթևեկությունը կապահովեն ռուս խաղաղապահները, հայտնել է Արցախի Ներքին գործերի նախարարությունը։ Դրանից հետո Արցախի հետ կապը պետք է ապահովվի այլընտրանքային ճանապարհով, որի կառուցումն ընթացքի մեջ է։
- Գլխավոր դատախազությունն այսօր հայտնել էր, որ «Սուրմալու» առևտրի կենտրոնում տեղի ունեցած պայթյունի դեպքի առթիվ նախաձեռնված քրեական վարույթով 4 անձ ձերբակալվել է։ Factor TV-ի հետ զրույցում Քննչական կոմիտեի մամուլի խոսնակ Վարդան Թադևոսյանն ասաց, որ ձերբակալվածներն են «Երևանի պահածոների գործարան» ՓԲԸ փոխտնօրենը, տարածքի վարձակալը և պահեստը շահագործող երկու անձինք։ Փոխտնօրենին և վարձակալին մեղադրանք է առաջադրվել հրդեհային անվտանգության կանոնները կամ պահանջները խախտելու համար, իսկ պահեստը շահագործող անձանց՝ անզգուշությամբ երկու կամ ավելի անձանց կյանքից զրկելու համար։
Այս ժամի լուրերը՝ տեսանյութում։
