ՄԻԵԴ-ը մերժել է Ադրբեջանի ներկայացրած դիմումը, Միրզոյանը խոսել է Ֆրանսիայի ԱԳ նախարարի հետ․ Լուրեր

• Մարդու իրավունքների եվրոպական դատարանը մերժել է Ադրբեջանի ներկայացրած դիմումը, տեղեկանում ենք Միջազգային իրավական հարցերով ՀՀ ներկայացուցչի գրասենյակից։ Մասնավորապես, օգոստոսի 18-ին Ադրբեջանը դիմել էր ՄԻԵԴ՝ խնդրելով պարտավորեցնել Հայաստանին դադարեցնել Բերձորի և շրջակա գյուղերի գույքի ոչնչացումը։ Ադրբեջանական կողմը պահանջել էր տները չայրել և տեղեկատվություն տրամադրել ձեռնարկված միջոցառումների վերաբերյալ: Սակայն օգոսոտոսի 22-ին ՄԻԵԴ-ը մերժել է Ադրբեջանի դիմումը և արձանագրել, որ բացակայում է նոր միջանկյալ միջոց կիրառելու անհրաժեշտությունը:
• Օգոստոսի 24-ին ՀՀ ԱԳ նախարար Արարատ Միրզոյանը հեռախոսազրույց է ունեցել Ֆրանսիայի ԱԳ նախարար Կատրին Կոլոննայի հետ։ Հեռախոսազրույցի ընթացքում կողմերն անդրադարձել են տարածաշրջանային անվտանգության և կայունության հարցերի։ 
• Գյումրու կենտրոնական Վարդանանց հրապարակին հարակից փողոցների մայթերին առևտրով զբաղվողները դժգոհում են, որ քաղաքապետարանն արգելում է փողոցային առևտուրը՝ իրենց առաջարկելով տեղափոխվել շուկայի «Լաչինի միջանցք» կոչվող հատված, մինչև վերջնականապես կլուծվի փակ շուկա ունենալու հարցը։ Առևտրականները, սակայն, նշում են, որ կենտրոնական շուկայի նշված հատվածում անհնար է 40 առևտրականի տեղավորելը, իսկ այդ հատվածի խանութատերերն իրենց արգելում են միրգ-բանջարեղեն վաճառել, քանի որ իրենք էլ են զբաղվում այդ ապրանքների առևտրով։

Այս ժամի լուրերը՝ տեսանյութում։