13.03.2026 | 18:36
Իրանի իշխանությունները զգուշացրել են քաղաքացիներին՝ չմասնակցել բողոքի ցույցերի
24 մլն-ի դիմաց ծառայություն՝ ընդամենը 4,5 ամսով, լրացավ Ուկրաինական պատերազմի կես տարին․ Լուրեր
24.08.2022 | 17:30
- Ուկրաինան այսօր նշում է Անկախության օրը։ Միաժամանակ, ուղիղ վեց ամիս առաջ Ռուսաստանը պատերազմ սանձազերծեց Ուկրաինայի դեմ՝ լայնամասշտաբ ներխուժում իրականացնելով այդ երկրի տարածք։ Դա տեղի ունեցավ այն բանից հետո, երբ Վլադիմիր Պուտինը ստորագրեց, այսպես կոչված, «Դոնեցկի ժողովրդական հանրապետության» և «Լուգանսկի ժողովրդական հանրապետության» անկախության մասին հրամանագրերը։ Պատերազմի 6 ամիսների ընթացքում ռուսական և ուկրաինական պատվիրակությունները 4 անգամ հանդիպել են զինադադար հաստատելու համար․ երեք անգամ Բելառուսում և մեկը՝ Թուրքիայում։ Սակայն կողմերը կարողացել են պայմանավորվել միայն հումանիտար միջանցքների շուրջ՝ հակամարտության գոտիներից խաղաղ բնակիչների տարհանման համար։
- Հայաստանի Պաշտպանության նախարարությունն օրենքի նոր նախագիծ է դրել շրջանառության մեջ․ «Զինվորական ծառայության և զինծառայողի կարգավիճակի մասին» օրենքում փոփոխություններ և լրացումներ կատարելու վերաբերյալ նախագծով նորակոչիկները հնարավորություն կունենան վաղաժամկետ ազատվել պարտադիր զինվորական ծառայությունից։ Դրա համար ծառայողը պետք է պետբյուջե վճարի 24 մլն դրամ։ Այդ դեպքում նրա ծառայության ընդհանուր տևողությունը կկազմի միջինը չորսուկես ամիս․ պարտադիր զինվորական ծառայության ուսումնական փուլը լրանալուց հետո նա կզորացրվի։
- Հայաստանի Կառավարությունը չի փոխհատուցի «Սուրմալու» տոնավաճառում տեղի ունեցած պայթյունից տուժած տնտեսվարողներին: Այս մասին Կառավարության նիստից հետո լրագրողների հետ զրույցում ասել է ՀՀ էկոնոմիկայի նախարար Վահան Քերոբյանը: Նրա խոսքով՝ «Սուրմալու» տոնավաճառում աշխատող գործարարները չէին ապահովագրել իրենց գույքը: Եթե ապահովագրած լինեին, ապա կրած վնասների դիմաց փոխհատուցում կստանային։ Ըստ Քերոբյանի՝ Կառավարությունում քննարկվում է պայթյունի հետևանքով տուժած քաղաքացիներին միայն սոցիալական աջակցություն տրամադրելու հարցը։
Այս ժամի լուրերը՝ տեսանյութում։
