Փաշինյանն ու Պուտինը հեռախոսով խոսել են․ Սուրմալուում անհետ կորած վերջին քաղաքացուն չեն գտել․ Լուրեր

• «Սուրմալու» առևտրի կենտրոնում որոնողական աշխատանքները դադարեցվել են․ հայտնել է Արտակարգ իրավիճակների նախարարությունը։ Որոնողական աշխատանքների արդյունքում անհետ կորած վերջին քաղաքացու՝ 1967 թվականին ծնված Վանիկ Խաչիկի Ամիրխանյանի մարմինը կամ գոնե մասունքները չեն հայտնաբերել։ Նշվում է, որ «Սուրմալու» առևտրի կենտրոնում տեղի ունեցած պայթյունի հետևանքով անհետ կորած համարվող քաղաքացուն հայտնաբերելու համար տարվող որոնողական աշխատանքները վերջին մի քանի օրերի ընթացքում իրականացվել են հավանական պայթյունի վայրում, որտեղ, ըստ տեղեկատվության, հավանաբար գտնվել է քաղաքացին։
• Հայկական կողմի նախաձեռնությամբ ՌԴ նախագահ Վլադիմիր Պուտինը հեռախոսազրույց է ունեցել ՀՀ վարչապետ Նիկոլ Փաշինյանի հետ, հայտնում է Կրեմլի պաշտոնական կայքէջը։ Թե ով է հեռախոսազրույցի նախաձեռնողը, Հայաստանի Կառավարության պաշտոնական հաղորդագրության մեջ չի նշվում։ Ըստ հաղորդագրության՝ երկու երկրների ղեկավարները շարունակել են քննարկումները Լեռնային Ղարաբաղի շուրջ իրավիճակի վերաբերյալ: Վերահաստատվել է 2020 թվականի նոյեմբերի 9-ի, 2021 թվականի հունվարի 11-ի և նոյեմբերի 26-ի եռակողմ պայմանավորվածությունների հետևողական իրականացման կարևորությունը: Միաժամանակ, ընդգծվել է տարածաշրջանում կայունության ապահովման գործում ռուսական խաղաղապահ առաքելությանը դերը:
• Հայաստանում 2022թ. սեպտեմբերի 15-ից դեկտեմբերի 15-ը զինված ուժերի պահեստազորայինների վարժական հավաքներ կանցկացվեն։ ՀՀ Պաշտպանության նախարարության ներկայացրած առաջարկն այսօր հաստատվեց Կառավարության նիստում։ Վարժական հավաքներին նախատեսվում է ներգրավել մինչև 318 քաղաքացու, որոնցից 210-ը` կրտսեր ենթասպայական և շարքային կազմերի, 10-ը` ավագ ենթասպայական կազմի, 98-ը` սպայական կազմի պահեստազորայիններ:

Այս ժամի լուրերը՝ տեսանյութում։