Քըլըչը շնորհակալություն է հայտնել Ռուբինյանին, Ռոբերտ Քոչարյանը մեկնել է արտերկիր. Լուրեր

• «Սուրմալու» առևտրի կենտրոնում տեղի ունացած պայթյունի հետևանքով անհետ կորած համարվող քաղաքացիներից մեկը նույնականացվել է։ Զոհված քաղաքացին Գագիկ Կառլենի Կարապետյանն է։ Այս մասին տեղեկացնում է ԱԻՆ խոսնակ Հայկ Կոստանյանը։  Որոնողափրկարարական աշխատանքների արդյունքում հայտնաբերվել է 16 քաղաքացու մարմին, բոլորը նույնականացված են։ ԱԻՆ փրկարարները որոնում են անհետ կորած հարվող Վանիկ Խաչիկի Ամիրխանյանին։
• ՀՀ երկրորդ նախագահ Ռոբերտ Քոչարյանը երեկ երեկոյան մեկնել է արտերկիր: Թե կոնկրետ որ երկիր՝ չի հստակեցվում։ Ըստ ՀՀ երկրորդ նախագահի գրասենյակի համակարգող Բագրատ Միկոյանի՝ Քոչարյանի փաստաբանական թիմը դիմել էր դատարանին՝ ստանալու մեկնելու թույլտվություն՝ օգտվելով այն հանգամանքից, որ նիստերի ընթացքում մեծ ընդմիջում կա մինչև սեպտեմբերի 20-ը։ Դատարանը թույլ է տվել Հայաստանից բացակայել օգոստոսի 22-29-ը։
• Հայ-թուրքական հարաբերությունների կարգավորման հարցով Հայաստանի հատուկ ներկայացուցիչ, ՀՀ ԱԺ փոխխոսնակ Ռուբեն Ռուբինյանը ցավակցել էր Թուրքիայի հատուկ ներկայացուցիչ Սերդար Քըլըչին՝ Թուրքիայում տեղի ունեցած խոշոր վթարների կապակցությամբ: Արձագանքելով Ռուբինյանի ցավակցությանը՝ Սերդար Քըլըչը շնորհակալություն է հայտնել։ Այդ մասին նա գրառում է արել թվիթերյան էջում։ Հիշեցնենք, որ Թուրքիայում վերջին օրերին տեղի ունեցած 2 խոշոր ավտովթարների հետևանքով զոհվել է 3 տասնյակից ավելի քաղաքացի:
• «Փեթակ» առևտրի կենտրոնի աշխատակիցները դադարեցրել են ակցիան, թեև պատկան մարմիններից հստակ պատասխան չեն ստացել առևտրի կենտրոնի աշխատանքը վերականգնելու իրենց պահանջի հետ կապված։ Factor․am-ի հետ զրույցում առևտրի կենտրոնի աշխատակիցներից մեկն ասել է, որ սպասում են հայտարարության։ Հիշեցնենք, որ առավոտից «Փեթակ»-ի մի խումբ տնտեսվարողներ հավաքվել էին՝ պատկան մարմիններից պահանջելով հստակ նշել, թե երբ կբացվի առևտրի կենտրոնը, և երբ իրենք կարողանան վերադառնալ աշխատանքի։«Այս պահին դեռ վերջնական որոշում չկա, լինելու պես կհայտարարենք»,- Factor․am-ին հայտնել է ԱԻՆ խոսնակ Հայկ Կոստանյանը։

Այս ժամի լուրերը՝ տեսանյութում։