19.08.2026 | 10:58
Ռուսական զորքերը հարվածել են Զապորոժիեին․ մեկ մարդ զոհվել է, յոթը՝ վիրավորվել
Գերմանիան առաջին կիսամյակում ավելացրել է արտահանումը
Քաղաքականություն
13.08.2022 | 12:55
Գերմանիան ավելացրել է ապրանքների արտահանումը 2022 թվականի առաջին կիսամյակում. արտահանման ծավալը, նախորդ տարվա նույն ժամանակահատվածի համեմատ, աճել է 13,4 տոկոսով՝ մինչև 763,9 միլիարդ եվրո։ Այս մասին հայտարարել է Գերմանիայի Վիսբադենի դաշնային վիճակագրական ծառայությունը, գրում է DW-ի ռուսական ծառայությունը։
Միաժամանակ, գերմանական արտահանումը Ռուսաստան հունվար-հունիս ամիսներին տարեկան կտրվածքով կրճատվել է 34,5 տոկոսով և կազմել 8,3 մլրդ եվրո։ Դա պայմանավորված է Ուկրաինայի պատերազմով և Ռուսաստանի դեմ սահմանված պատժամիջոցներով։
Գերմանական ներմուծման ծավալը 2022 թվականի առաջին վեց ամիսներին, նախորդ տարվա նույն ժամանակահատվածի համեմատ, աճել է 26,5 տոկոսով՝ հասնելով 729,6 միլիարդ եվրոյի։
Ռուսաստանից Գերմանիա ներմուծումն աճել է 51,3 տոկոսով՝ մինչև 22,6 մլրդ եվրո, ինչը, մասնավորապես, պայմանավորված է էներգակիրների գների բարձրացմամբ։ Ֆիզիկական առումով Ռուսաստանից ներմուծումը, 2021 թվականի առաջին կիսամյակի համեմատ, նվազել է 24 տոկոսով։
Տաթև Ֆռանգյան
