15.05.2026 | 12:10
ՀՀ-ում ասիական հանցավոր խմբավորում է բացահայտվել // Ադրբեջանով 14 վագոն ցորեն է գալիս ՀՀ․ ԼՈՒՐԵՐ
ԱՄՆ-ը կրկին ընդգծել է ԼՂ հակամարտության և դրանից բխող հարցերի բանակցային, համապարփակ և կայուն կարգավորման կարևորությունը
Քաղաքականություն
09.08.2022 | 17:05
ԵԱՀԿ-ում ԱՄՆ առաքելության ղեկավարի տեղակալ Քորթնի Օսթինը հայտարարել է, որ ԱՄՆ-ը խորապես մտահոգված է Լեռնային Ղարաբաղի շուրջ ինտենսիվ մարտերի մասին տեղեկություններով։
«Միացյալ Նահանգներն իր խորը մտահոգությունն է հայտնում Լեռնային Ղարաբաղի շուրջ ինտենսիվ մարտերի, ներառյալ՝ մարդկային կորուստների մասին տեղեկությունների առնչությամբ։ Մենք ուշադիր հետևում ենք իրավիճակին և կոչ ենք անում անհապաղ քայլեր ձեռնարկել՝ լարվածությունը նվազեցնելու և հետագա սրացումից խուսափելու համար»,- ասել է Օսթինը։
«Ինչպես բազմիցս նշել ենք Մշտական խորհրդում՝ Միացյալ Նահանգներն ընդգծում է Լեռնային Ղարաբաղի հակամարտության հետ կապված կամ դրանից բխող մնացած հարցերի բանակցային, համապարփակ և կայուն կարգավորման կարևորությունը։ Նախորդ շաբաթ պետքարտուղար Բլինքենը անձամբ է ներագրավվել Հայաստանի վարչապետ Նիկոլ Փաշինյանի ու Ադրբեջանի նախագահ Իլհամ Ալիևի հետ զրույցներում՝ ապաէսկալացիայի և ուղիղ շփումների կոչ անելով՝ լարվածությունը թուլացնելու համար։ Միացյալ Նահանգները պատրաստ է համագործակցել երկկողմանի՝ համախոհ գործընկերների հետ և որպես ԵԱՀԿ Մինսկի խմբի համանախագահ՝ նպաստելու Հայաստանի և Ադրբեջանի միջև երկխոսությանը և օգնելու հասնել հակամարտության երկարաժամկետ քաղաքական կարգավորմանը»,- հավելել է ամերիկացի դիվանագետը։
Էմմա Չոբանյան
