Պետք է աուդիտ անցկացվի, որպեսզի տեսնենք՝ ինչ հսկայական «լվացքատներ» են գործել քաղաքապետարանում․ Նարինե Թուխիկյան. ՏԵՍԱՆՅՈՒԹ

«Ուրախ եմ, որ կառավարությունում ընդգրկված են թարմ և երիտասարդ կադրեր։ Նախորդ իշխանությունները տասնամյակներով իրենց աթոռներին նստած են եղել, դա վատ փորձառություն է, ինչի հետևանքով արհավիրք եղավ Հայաստանում։ Որևէ ոլորտ չկա, որ փորձառու մասնագետներին ապականած չլինեին։ Այնպես որ, եկեք ժամանակ տանք կառավարությանը և վերահսկենք նրան»,- Factor.am-ի հետ զրույցում նման տեսակետ է հայտնում Հովհաննես Թումանյանի թանգարանի տնօրեն Նարինե Թուխիկյանը։

Նրա խոսքով՝ կառավարության գործունեության նկատմամբ կիրառվում են հակաքայլեր, որոնք բավական թույլ են․ «Ես՝ իբրև ՀՀ քաղաքացի, շատ ուզում եմ անշահախնդրորեն օգնած լինել կառավարությանը։ Ինձ համար կարևոր է, որ այն արդյունքը, որ ունեցանք, ամրապնդվի»,- ասում է մեր զրուցակիցը։

Անդրադառնալով քաղաքապետ Տարոն Մարգարյանի հեռանալու՝ քաղաքացիների մի մասի պահանջին՝ տիկին Թուխիկյանը ուրախություն է հայտնում այդ առնչությամբ: «Սա վկայում է, որ մենք իսկապես արթնացել ենք մեծ և խորը թմբիրից։ Հասկանալի է նաև, թե ինչու է Տարոն Մարգարյանը կառչում իր պաշտոնից։ Բայց այս հարցերը ժամանակի ընթացքում կկարգավորվեն։ Վստահ եմ, որ քաղաքապետարանի աշխատանքում կհայտնաբերվեն կոռուպցիոն սարսափելի պատմություններ, պետք է աուդիտ անցկացվի, որպեսզի տեսնենք՝ ինչ հսկայական «լվացքատներ» են գործել այդ կառույցում»,- մեկնաբանում է նա։

Տիկին Թուխիկյանը խոսում է նաև մշակույթի նախարարության հանձնարարականներից։ Ի դեպ, նա մի քանի այլ թանգարանների տնօրենների հետ հասցրել է հյուրընկալվել մշակույթի նորանշանակ նախարար Լիլիթ Մակունցին: «Հրավերն անսպասելի էր, որովհետև նախորդ նախարարների դեպքում մենք ընդունելության չէինք արժանացել»,- շեշտում է նա։

Թանգարանի տնօրենի համոզմամբ՝ Մշակույթի նախարարությունը պետք է կրի կառուցվածքային և բովանդակային չափազանց լուրջ փոփոխություններ, որովհետև ժառանգված մոտեցումները ժամանակավրեպ են և անարդյունավետ։ «Ժողովրդի չհիասթափվելու և չհուսահատվելու բանալին կառավարության ձեռքում է։ Հասկանում եմ, որ հակազդեցությունները ևս շատ են, հարկավոր է արագ գործել և լսել մարդկանց, որոնք գուցե կուլիսներում են, բայց շատ բան գիտեն»,- նշում է նա։

Մանրամասները՝ տեսանյութում։

Աննա Բաբաջանյան