Քաղաքականություն
08.08.2022 | 23:01
Շիա ծայրահեղական «Մահդիի ծառաների միություն» կազմակերպությունը հայտարարություն է տարածել, որում հաստատել է, որ օգոստոսի 4-ին Լոնդոնում Ադրբեջանի դեսպանատան դեմ հարձակումն իրականացվել է իրենց կողմից՝ Ադրբեջանի նախագահ Իլհամ Ալիևի և նրա կառավարության դեմ։
«Ադրբեջանի կառավարությունը պատասխանատու է երկարամյա հանցագործությունների և բնակչության իրավունքների հետապնդումների, բնակչության անհատական ազատությունների և անձնական գործերի միջամտելու համար։ Վերջին կաթիլը դարձավ օրերս մի կնոջ հալածանքը, որը ենթարկվեց վիրավորանքների և հետպնդման միայն այն բանի համար, որ իր տան պատին գրել էր սուրբ գործիչ և ազատության խորհրդանիշ Իմամ Հուսեյինի խոսքերը»,- ասվում է հայտարարության մեջ։
Նշվում է նաև, որ կազմակերպությունը բողոքի նման ակցիաներ է անցկացնում ու պահանջում է միջազգային հանրությունից անհապաղ միջոցներ ձեռնարկել՝ ամբողջ աշխարհում շիա ժողովուրդների պաշտպանության ու կրոնական դավանանքի ազատության համար։
Հիշեցնենք, որ օգոստոսի 4-ին այս կազմակերպության անդամները գրոհել էին Լոնդոնում Ադրբեջանի դեսպանատան շենքը՝ գրավելով այն։ Նրանք իջեցրել էին Ադրբեջանի դրոշը, արաբերեն գրառումներ արել պատերին, գետնին էին գցել Ադրբեջանի գործող նախագահ Իլհամ Ալիևի ու նախկին նախագահ Հեյդար Ալիևի դիմանկարներն ու ոտնատակ տվել։
Միջադեպի պատճառով ոստիկանությունը ձերբակալել էր ութ մարդու։ Ի դեպ, այս խմբավորման անդամները 2018 թվականին հարձակվել էին նաև Լոնդոնում Իրանի դեսպանատան վրա։
Էմմա Չոբանյան
