04.02.2026 | 23:29
ՇՄ նախարարը և Դևիդ Կուպերը քննարկել են «Կենսաբանական բազմազանության մասին» կոնվենցիայի ներքո ընթացող գործընթացներ
Աղավնոյի բնակիչներին հորդորել են մինչև օգոստոսի 25-ը լքել գյուղը
05.08.2022 | 17:09
Աղավնոյի համայնքապետ Անդրանիկ Չավուշյանը Factor.am-ի հետ զրույցում ասաց, որ ԱՀ տարածքային կառավարման և ենթակառուցվածքների նախարար Հայկ Խանումյանը բնակիչներին զգուշացրել է, որ մինչև օգոստոսի 25-ը պետք է լքեն Աղավնոն։
«Ադրբեջանը գրավոր պահանջել է, ասում է՝ մենք ճանապարհը կառուցել ենք, դուք՝ չէ։ Ասում են՝ մեր խնդիրը չէ՝ հայկական կողմը այլ ճանապարհ կառուցե՞լ է, թե՞ ոչ։ Պահանջում են՝ պետք է հանձնեք Լաչինի միջանցքը»,- ասաց Անդրանիկ Չավուշյանը։
Համայնքապետն ասաց, որ իշխանություններն այսօր տարհանման մասին քննարկումներ են ունեցել, այս պահին բնակարան չեն տալու, բնակիչները պիտի տուն վարձեն, մինչև բնակարանների հարցը լուծվի։
«Բնակիչները տխուր են, չեն ուզում իրենց սեփական տունը թողնել թշնամուն։ Նիկոլ Փաշինյանն է հասցրել այս ամեն ինչին, հիմա էլ ասում է՝ դուք հարցը լուծեք»,- ասաց Աղավնոյի համայնքապետը։ Չավուշյանը նաև ասաց, որ այս պահին Արցախում իրավիճակը հանգիստ է, քանի որ հստակ պայմանավորվածություն կա Սուսը, Բերձորն ու Աղավնոն լքելու։
«Եթե միչև վերջնաժամկետը գյուղերից դուրս չգան՝ իրավիճակը կլարվի։ Առաջ հողի համար կյանք էին տալիս, հիմա հող ենք տալիս, որ մեկ հոգու կյանք չտանք»,- ասաց Չավուշյանը։
Արփի Հակոբյան
