12.12.2025 | 23:31
Պուտինի օգնականը չի բացառել պատերազմի ավարտից հետո Դոնբասի ապառազմականացումը
Եթե ԿԲ-ն իջեցնի տոկոսադրույքը, դոլարը կբարձրանա մինչև 430 դրամ, բայց ոչ ավելի․ Աղասի Թավադյան․ ՏԵՍԱՆՅՈՒԹ
Տնտեսություն
03.08.2022 | 20:02
Վիճակագրական կոմիտեն հրապարակել է գնաճի վերաբերյալ նոր տվյալներ։ Դրանց և այլ թեմաների մասին Factor TV-ն զրուցել է Tvyal.com հարթակի հիմնադիր, տնտեսագետ Աղասի Թավադյանի հետ։
-Պարո՛ն Թավադյան, նախ գնաճի թարմ թվերից խոսենք։ ՍԳԻ-ն 9,3 տոկոս է, որը 1 տոկոսային կետով ցածր է նախորդ ամսվա նկատմամբ։ Ըստ էության, ունենք գնաճի դանդաղում։ Ինչպե՞ս եք գնահատում սա, ինչի՞ շնորհիվ է ապահովվել այս նվազումը։
-Նախ ասեմ, որ Հայաստանի գնաճը ոչ այնքան ներքին մոնետար գործոն է, այլ ավելի շատ նրա ազդեցությունը կախված է համաշխարհային գնաճից։ Եթե նայենք համաշխարհային միջին գնաճը և ՀՀ գնաճը, ապա Հայաստանի գնաճը 3-6 ամիս լագով (հապաղումով) կրկնում է համաշխարհային գնաճը։ Այսինքն, զուտ կարող ենք նայել՝ ինչ վիճակում է համաշխարհային գնաճը, նույնը մի քանի ամիս մեզ մոտ է լինելու։
Այս պահին համաշխարհային գնաճը բավականին բարձր է։ Դա նշանակում է, որ ՀՀ-ում էլ մոտակա մի քանի ամիսների ընթացքում սպասվում է համեմատաբար բարձր գնաճ։
–Ամեն դեպքում՝ ունենք տեմպի նվազում։ Եթե Ձեր ասած լագով նայենք, ապա հետագայում սպասվում է, որ գնաճը կարող է ավելի բարձրանալ, որովհետև աշխարհում ավելի բարձր է։
-Միգուցե և դա հաշվի առնելով՝ Կենտրոնական բանկը վերաֆինանսավորման տոկոսադրույքը բարձրացրեց 0,25 տոկոսային կետով։ Ինչքան վերաֆինանսավորման տոկոսադրույքը ցածր լինի, այնքան տնտեսությունն արագանում է, այնքան տնտեսությունն ազատ է շնչում։ Սակայն դա որոշակի ռիսկեր ունի․ հավելյալ գնաճի ռիսկեր է պարունակում։
Սակայն կարելի էր տոկոսադրույքը իջեցնել, որովհետև արդեն իսկ ունենք 1 տոկոսային կետի գնաճի նվազում, որը որոշակի ազդակ է հանդիսանում, որ հիպերինֆլյացիայի վտանգ չկա։ Այսինքն, կարելի է թուլացնել վերաֆինանսավորման տոկոսադրույքի ճնշումը տնտեսության վրա, որը իր հերթին կարող է արժեզրկել դրամը և բարձրացնել դոլարի կուրսը, ճիշտ է՝ մի քիչ ավելի, ոչ թե մինչև 480 դրամ։
–Գիտենք, որ Ռուսաստանից շատ դոլար է եկել այստեղ, և նաև դրա հաշվին ունենք նոր փոխարժեք։ Երբ Ռուսաստանից այդ դոլարը սկսի այլևս չգալ, ի՞նչ է լինելու։
-2015 թվականից մեր մոտ փոխարժեքը 480 դրամ է։ Մե՛նք ենք սովոր դրան։ Եվ մենք նաև մեր մեծ գործարքները կնքում ենք դոլարով՝ մեքենաներ, տներ, և խնայողությունների մի մասը նույնպես պահում ենք դոլարով։ Եվ սա մեծ հարված է նաև այդ մարդկանց համար։
Ինչքա՞ն կտևի այս իրավիճակը։ Մինչև այն ժամանակ, երբ Կենտրոնական բանկը իջեցնի տոկոսադրույքը։ Այն պահին, երբ Կենտրոնական բանկը որոշի իջեցնել վերաֆինանսավորման տոկոսադրույքը, կարելի է սպասել, որ փոխարժեքը, այսինքն հայկական դրամը կսկսի արժեզրկվել, բայց ոչ այն մակարդակին, ինչ ակնկալում ենք։ Կարող է դոլարը բարձրանալ մինչև 430 դրամ, երևի թե։
Հարցազրույցն ամբողջությամբ՝ տեսանյութում։
Գարիկ Հարությունյան
