17.02.2026 | 23:22
ՀՀ ԱԳ նախարարի տեղակալը Հռոմում ներկայացրել է COP17-ի Հայաստանի նախագահության առաջնահերթությունները
Այսօրվանից ԱԺ-ն հնարավորություն ունի Փաշինյանին անվստահություն հայտնելու․ ընդդիմադիրները՝ այս գործիքից օգտվելու մասին
Քաղաքականություն
02.08.2022 | 14:02
Ազգային ժողովի «Հայաստան» խմբակցությունից իրարամերժ պատասխաններ են տալիս այսօր մամուլում հրապարակված այն տեղեկությունների վերաբերյալ, թե քննարկում են պատգամավորական մանդատներից հրաժարվելու հարցը։ Ըստ հրապարակման՝ ոչ միայն գործող, այլ նաև ցուցակում ներառված, բայց խորհրդարան չանցած թեկնածուները ևս պետք է հրաժարվեն մանդատները վերցնել։
«Հայաստան» խմբակցության պատգամավոր, դաշնակցական Գեղամ Մանուկյանը Factor.am-ի հետ զրույցում տեղեկությունը ո՛չ հերքեց, ո՛չ հաստատեց, ասաց, որ թեման չի մեկնաբանում։
Դաշնակցական մեկ այլ պատգամավոր Արթուր Խաչատրյանն էլ նշեց․ «Մենք հայտարարել ենք, որ եթե ընդդիմությունը գնա խորհրդարան, գնալու է իր օրակարգով։ Խորհրդարանի հետ կապված այլ բան չենք հայտարարել»։
Նշենք, որ այսօր լրանում է Նիկոլ Փաշինյանի վարչապետության մեկ տարին՝ 2021 թվականի արտահերթ ընտրություններից հետո։ Այսօրվանից խորհրդարանը Փաշինյանին անվստահություն հայտնելու լիազորություններ է ստանում։
Գեղամ Մանուկյանից հետաքրքրվեցինք՝ արդյո՞ք ընդդիմությունը կնախաձեռնի անվստահության գործընթաց։ Ընդդիմադիր պատգամավորի խոսքով՝ այս մասին Իշխան Սաղաթելյանն իրենց դիրորոշումը հստակեցրել է վերջին հանրահավաքի ժամանակ։
Նշենք, որ անցյալ ուրբաթ տեղի ունեցած հանրահավաքի ժամանակ Իշխան Սաղաթելյանը հայտարարել էր, որ Փաշինյանի պաշտոնանկության գործընթացը կնախաձեռնեն, երբ հաջողության հասնելու համար բավարար հիմքեր ունենան։
Հավելենք, որ ընդդիմադիր «Հայաստան» և «Պատիվ ունեմ» խմբակցությունների պատգամավորների քվեները բավարար չեն Փաշինյանին խորհրդարանում անվստահություն հայտնելու և նոր վարչապետ ընտրելու համար։
Նարեկ Կիրակոսյան
