Կոսովոն մեկ ամսով հետաձգեց Սերբիայի քաղաքացիների համար մուտքի նոր կանոնների ներդրումը

Համաշխարհային հանրության մի մասի կողմից ճանաչված Կոսովոյի Հանրապետության իշխանությունները որոշել են մեկ ամսով հետաձգել Սերբիայի քաղաքացիների մուտքի նոր կանոնների ներդրումը։ Հետաձգման պատճառ է դարձել սերբերի մոտ բարձրացած դժգոհության ալիքը, որը լուրջ լարվածություն էր առաջացրել կողմերի միջև գրում է BBC-ի ռուսական ծառայությունը։

«Պրիշտինայի վարչակազմի համաձայն՝ այդ միջոցառումները կհետաձգվեն մինչև սեպտեմբերի 1-ը, եթե երկուշաբթի օրը վերացվեն վարչական սահմանի անցակետերի բարիկադները», – հաղորդում է տեղական հեռուստատեսությունը։ Նշվում է, որ նման որոշում է կայացվել ԱՄՆ իշխանությունների խնդրանքով։

Նախատեսվում էր, որ օգոստոսի 1-ից Սերբիայի անձնագրով Կոսովո մուտք գործել ցանկացող քաղաքացիները պետք է երեք ամիս ժամկետով երկրից մուտքի և ելքի համար հատուկ փաստաթուղթ ստանան, ինչպես ցամաքային, այնպես էլ օդային ճանապարհով սահմանը հատելիս։ Բացի այդ, սերբական պետհամարանիշներով մեքենաների վարորդները պետք է վերագրանցեն դրանք։

Նոր սահմանափակումները հիմնականում անդրադառնալու էին Կոսովսկի Միտրովիցա քաղաքի բնակիչների վրա՝ Կոսովոյի հյուսիսում գտնվող քաղաքի, որտեղ հիմնականում էթնիկ սերբեր են ապրում: Սերբիան չի ճանաչում Կոսովոյի անկախությունը և այդ պատճառով այս քաղաքը համարում է իր տարածքը։

Հիշեցնենք՝ հուլիսի 31-ին զինված բախումներ էին սկսվել Կոսովոյի՝ հիմնականում սերբերով բնակեցված հյուսիսային շրջանում՝ Կոսովո մեկնելու կանոնների փոփոխության պատճառով։ Սերբիայի նախագահ Ալեքսանդր Վուչիչը հայտարարել էր, թե Կոսովոյի բանակը պատրաստվում է կեսգիշերին հարձակվել երկրի հյուսիսում գտնվող սերբերի վրա։ «Եթե նրանք փորձեն հալածել սերբերին, ահաբեկել սերբերին, սպանել սերբերին, Սերբիան կհաղթի: Սա այն ամենն է, ինչ ես ուզում եմ ասել», – ասել էր Ցուչիչը: Ավելի ուշ նա հայտարարել էր, թե Սերբիան «խաղաղության է ձգտելու»։ Կոսովոյի վարչապետ Ալբին Կուրտին իր հերթին անկարգությունների հրահրման մեջ մեղադրել էր Սերբիայի նախագահին։

Տաթև Ֆռանգյան