Ադրբեջանի ԶՈւ-ն կրակել է նաև ՀՀ սահմանին․ Արցախում ադրբեջանցիների կրակոցներից տուն է վնասվել․ Լուրեր

• Այսօր ժամը 12։00-ի սահմաններում Ադրբեջանի ԶՈՒ ստորաբաժանումները տարբեր տրամաչափի հրաձգային զինատեսակներից կրակ են բացել հայ-ադրբեջանական սահմանի արևելյան հատվածում տեղակայված հայկական մարտական դիրքերի ուղղությամբ․ տեղեկացնում են ՀՀ ՊՆ-ից։ Հայկական կողմի պատասխան գործողություններով ադրբեջանական ստորաբաժանումների կրակը լռեցվել է։ Հայկական կողմում տուժածներ չկան։
• Մինչ այդ հայտնել էինք, որ Ադրբեջանի ԶՈՒ ստորաբաժանումները երեկ և այսօր կրակել են Արցախի Տոնաշեն, Կարմիր Շուկա և Թաղավարդ գյուղերի ուղղությամբ։ Արցախի ՄԻՊ Գեղամ Ստեփանյանը հայտնել է, որ խոցվել է Կարմիր շուկա համայնքի բնակիչներից մեկին պատկանող տան պատուհանը, նույն տան բակում հայտաբերվել է հրաձգային զինատեսակի 8 փամփուշտ։ Քաղաքացիական բնակչության շրջանում տուժածներ չկան։
• Արցախի ՄԻՊ-ը նշել է, որ ադրբեջանական կողմի ագրեսիվ վարքագիծը ցուցադրում է, որ ադրբեջանական ղեկավարությունը շարունակում է վարել Արցախի ժողովրդի նկատմամբ ատելության, հոգեբանական ու ֆիզիկական բռնության կիրառման, Արցախի էթնիկ զտման քաղաքականություն։
• ՊՎԾ-ն ուսումնասիրություններ է իրականացրել Երևանի քաղաքապետարանում և հայտնաբերել է միլիարդավոր դրամների խախտումներ։ 2018-2022թթ վերաբերյալ ուսումնասիրությունը հայտնաբերել է 8.5 միլիարդ ՀՀ դրամի խախտումներ։ Եվս 7.3 միլիարդ ՀՀ դրամի խախտումներ հայտնաբերվել են 2011-2018թթ. Վարեաբերյալ ուսումնասիրության արդյունքում։ Հարուցվել են քրեական գործեր:

Այս ժամի լուրերը՝ տեսանյութում։