26.08.2026 | 23:30
Երևանում ապամոնտաժվել են ևս երկու ապօրինի կառույցներ. քաղաքապետարան
ԱԺ խորհուրդը նիստ է հրավիրել․ օրակարգում ընդդիմադիրներին մանդատներից զրկելու հարցով ՍԴ դիմելն է
Քաղաքականություն
21.07.2022 | 23:30
Ազգային ժողովի աշխատակազմն ԱԺ խորհրդի նիստ է հրավիրել․ օրակարգում ընդդիմադիր «Հայաստան» և «Պատիվ ունեմ» խմբակցության 33 պատգամավորներին մանդատներից զրկելու հարցով Սահմանադրական դատարան դիմելն է։
Հիշեցնենք՝ մեկ շաբաթ առաջ ևս այս հարցով ԱԺ խորհուրդը նիստ գումարեց, սակայն այն քվորումից անմիջապես հետո ավարտվեց, քանի որ ընդդիմադիրները ներկա չէին։ ԱԺ կանոնակարգի համաձայն՝ եթե պատգամավորը, որին մանդատից զրկելու հարցով պետք է դիմեն, ներկա չէ նիստին, այդ դեպքում նիստը չի շարունակվում։
Մեկ շաբաթ անց օրենքի ուժով գումարվում է երկրորդ նիստը, որի ընթացքում՝ անկախ այն հանգամանքից տվյալ պատգամավորը ներկա է, թե՝ ոչ, խորհուրդը որոշում է կայացնում դիմել կամ չդիմել ՍԴ։
Հայտնի է, որ «Քաղաքացիական պայմանագիր» խմբակցությունը չի դիմելու։ Իշխող ուժի դիրքորոշումը մեկ շաբաթ առաջ հայտնեց ԱԺ փոխնախագահ Ռուբեն Ռուբինյանը՝ նշելով, որ իրենց համար կարևոր է հաշվի առնել ժողովրդի քվեն։
Ընդդիմադիրներին մանդատներից զրկելու հարցն օրակարգում է հայտնվել նրանց՝ ԱԺ նիստերից բացակայելու պատճառով։ «Հայաստան» և «Պատիվ ունեմ» խմբակցությունների պատգամավորները մայիսից դադարեցրել են մասնակցել խորհրդարանական աշխատանքներին և բողոքի ակցիաներով պահանջում են Փաշինյանի հրաժարականը։
