Շինարարություն` առանց նորմերը պահելու․ Երևանի կենտրոնում օդը փոշոտ է թույլատրելիից ավելի․ՏԵՍԱՆՅՈՒԹ

Երևանի Հանրապետության հրապարակին հարող Արամի 2 հասցեում տևական ժամանակ է՝ շինարարություն է իրականացվում․ բնակելի շենք է կառուցվում։ Չնայած դրան՝ շինհրապարակն անցորդներից բաժանող և փոշու արտանետումները նվազեցնող ցանկապատ տարածքում չկա։

Թեև շինարարություն իրականացնողները վստահեցրին, որ ավարտին քիչ է մնացել, սակայն մինչ այդ մարդիկ ստիպված են անցնուդարձ անել փոշու միջով։ Երևանի քաղաքապետարանի լրատվության վարչության պետի տեղակալ Տարոն Գևորգյանը մեզ վստահեցրեց, որ խնդիրն իրենց ուշադրության տիրույթում է։ Քաղաքաշինության և հողի վերահսկողության վարչության աշխատակիցներին հանձնարարվել է այցելել տարածք և պարզել՝ ինչու շինհրապարակը սահմանազատված չէ։

Մայիսի 27-ին էլ Երևանի քաղաքապետարանը հայտնեց, որ հիմնանորոգվում է Հանրապետության հրապարակի մետրոյի կայարանի քարե շինությունն ու բարեկարգվում է տարածքը։ Համայնքային իշխանությունը նպատակ ունի ոչ միայն բարեկարգել տարածքը, այլև այստեղ վերադարձնել ամառային Երևանում հանգստի ու ժամանցի զով անկյուն փնտրող երևանցիներին ու զբոսաշրջիկներին:

Պարզվում է՝ Հանրապետության հրապարակի շինհրապարակը ևս սահմանազատված չէ, միայն փոքր հատվածն է ցանցապատված։ Հայաստանի ճարտարապետների միության նախագահ Մկրտիչ Մինասյանը Factor TV-ի հետ զրույցում ասաց, որ ամբողջ տարածքում է ցանցապարիսպ եղել, բայց քաղաքացիների անփութության հետևանքով այն վնասվել է ու պոկվել: «Մարդիկ քանդում-անցնում են, իրենց պետք չէ»,- ասաց Մինասյանը:

Քաղաքապետարանի լրատվության վարչության պետի տեղակալ Տարոն Գևորգյանն էլ ընդգծեց, որ տարածքը հիմնովին չսահմանազատելու մի քանի պատճառներ կային․ հիմնականն այն է, որ այդտեղի սալիկները անվնաս մնային։ Շուրջ 3 ամիս իրականացվող հիմնանորոգման ավարտը նախատեսված է հոկտեմբերին։

Մինչ պատասխանատուները փորձում են պարզել, թե ինչու մայրաքաղաքի տարբեր հատվածներում շինհրապարակները չեն համապատասխանում նորմատիվներին, Հիդրօդերևութաբանության և մոնիթորինգի կենտրոնը հրապարակում է մտահոգիչ տվյալներ։ Հուլիսի 7-13-ն ընկած ժամանակահատվածում Երևանի Կենտրոն, Շենգավիթ, Արաբկիր, Նոր Նորք վարչական շրջաններում փոշու պարունակությունը հերթական անգամ գերազանցել է սահմանային թույլատրելի կոնցենտրացիան։

Մանրամասները` տեսանյութում:

Արփի Հակոբյան