15.09.2026 | 18:52
Հայաստանի հավաքականի բասկետբոլիստը կխաղա ԱՄՆ-ում
Արտամարմնային բեղմնավորման ծրագրի արդյունքներով 6 ամսվա ընթացքում ծնվել է 44 երեխա․ ՏԵՍԱՆՅՈՒԹ
20.07.2022 | 11:46
ՀՀ առողջապահության նախարարության «Անպտղության հաղթահարման» պետական ծրագրով ցուցանիշները տարեցտարի բարելավվում են, ընդլայնվում շահառուների շրջանակը: «Անպտղության հաղթահարում. Պատերազմում զավակ կորցրած մայրերի արտամարմնային բեղմնավորման ծրագրի արդյունքները» թեմայով ասուլիսում այս մասին հայտնեց ՀՀ առողջապահության նախարարության Մոր և մանկան առողջության պահպանման վարչության պետ Նունե Փաշայանը։
«2022թ. 6 ամսվա ընթացքում ծրագրի շրջանակում ծնվել է 44 երեխա, գրանցվել է 104 նոր հղիություն: Չեմ խոսում նախորդ տարի արձանագրված հղիությունների մասին, որոնց ծնունդները սպասում ենք տարվա երկրորդ կեսին»,- նշեց Փաշայանը։
Նրա խոսքով՝ նկատվել նաև ընդհանուր շահառուների թվի ավելացում, եթե 2021-ին ամբողջ տարվա ընթացքում ծրագրի շրջանակում սպասարկվել է 917 շահառու, ապա այս տարվա միայն առաջին կիսամյակում արդեն 577 շահառու:
ՀՀ առողջապահության նախարարության Մոր և մանկան առողջության պահպանման վարչության պետի հավաստմամբ՝ եթե ծրագրի շրջանակում անձը ճանաչվել է շահառու, ապա բոլոր ծախսերն իրականացվում են պետական միջոցների հաշվին՝ հետազոտություն, բեղմնավորում, ներպատվաստում արգանդի խոռոչում:
«Ծրագրի շահառու կարող են դառնալ հաշմանդամություն ունեցող անձինք, եթե հաշմանդամությունը չի խոչընդոտում կնոջ հղիությանը, սահմանամերձ բնակավայրերի բնակիչները, զինծառայողներն ու զինծառայողներին հավասարեցված անձինք, 44 օրյա պատերազմում զոհվածների ծնողները,- նշեց Փաշայանը՝ հավելելով, որ վերջին փոփոխության արդյունքում կարող են դիմել նաև դատական կարգով անհետ կորած ճանաչվածների և 44 օրյա պատերազմից հետո սահմանին զոհված զինվորների ծնողները:
Նա նաև ընդգծեց, որ 44 -օրյա պատերազմի ժամանակ զոհված զինծառայողների ընտանիքներում արդեն 20 երեխա ծնվել է: Գրանցվել է 31 նոր հղիություն։
Մանրամասները՝ տեսանյութում:
