09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
«Մենք կսառեցնենք ՆԱՏՕ-ի անդամակցության գործընթացը»․ Էրդողանը կրկին սպառնացել է Շվեդիային ու Ֆինլանդիային
Քաղաքականություն
18.07.2022 | 22:26
Անկարան չի հաստատի ՆԱՏՕ-ին Շվեդիայի ու Ֆինլանդիայի անդամակցությունը երկու Սկանդինավյան երկրների՝ ահաբեկչության դեմ պայքարի ոլորտում ստանձնած պարտավորությունները չկատարելու դեպքում։ Նման հայտարարություն է արել Թուրքիայի նախագահ Ռեջեփ Թայիփ Էրդողանը, գրում է Անադոլու գործակալությունը։
«Նման դեպքում մենք կսառեցնենք գործընթացը»,-ասել է Էրդողանը կառավարության նիստից հետո։
Նա ուշադրություն է հրավիրել Մադրիդում կայացած ՆԱՏՕ-ի վերջին գագաթնաժողովի արդյունքների վրա, որի ընթացքում Անկարան ամենաբարձր մակարդակով ցույց է տվել իր վերաբերմունքը ճգնաժամային իրավիճակներին։
Թուրքիայի նախագահն ընդգծել է, որ հատկապես Շվեդիան տվյալ փուլում դրական մոտեցում չի ցուցաբերում Անկարային հուզող հարցերի նկատմամբ։
«Մեր դիրքորոշումը հստակ սահմանված է։ Հետագա ընտրությունը հենց երկրներինն է (ՆԱՏՕ-ի թեկնածուներինը ),-ընդգծել է Էրդողանը:
Հավելենք, որ Թուրքիան Շվեդիայի ու Ֆինլանդիայի՝ ՆԱՏՕ-ի անդամակցության վետոն հանեց այն բանից հետո, երբ երեք երկրները հուշագիր ստորագրեցին, որի համաձայն՝ Սկանդինավյան երկրները նաև Անկարային են արտահանձնելու «ահաբեկիչներին»։ Թուրքիան էլ գրավոր հարցում է ուղարկել Շվեդիային և Ֆինլանդիային՝ պահանջելով արտահանձնել «Քուրդիստանի աշխատավորական կուսակցության» և FETO-ի ՝ Գյուլենական շարժման ներկայացուցիչներին։
Շվեդիայի ու Ֆինլանդիայի իշխանություններն էլ նշել են, որ արտահանձնման որոշումները կայացնելու է դատարանը և գործընթացներն ընթանալու են երկրների օրենսդրությանը համապատասխան։
Էմմա Չոբանյան
