Թուրքիայում պետական աշխատողները բողոքի ակցիա են անցացրել աննախադեպ գնաճի դեմ

Թուրքիայում պետական ծառայողների արհմիությունների կոնֆեդերացիայի (KESK) անդամները հուլիսի 18-ին այրել են իրենց աշխատավարձի ցուցակները՝ ի նշան բողոքի աճող գնաճի և աշխատավարձերի նվազման պայմաններում, գրում  են  թուրքական լրատվամիջոցները։

Բողոքի ակցիան տեղի է ունեցել Անկարայի ուսուցիչների Eğitim-Sen արհմիության թիվ 5 մասնաճյուղի դիմաց։ Ցուցարարները հսկայական պաստառ են պահել՝ «Բավական է, մենք վարձատրություն ենք ուզում, որը բավական լինի մարդավարի ապրելու համար» գրությամբ։

Պետական աշխատողները դժգոհել են, որ այս ամսվա սկզբին պետծառայողների և պետական հատվածի թոշակառուների համար հայտարարված 41,7 տոկոս աշխատավարձի բարձրացումը բավարար չէ, քանի որ իրական գնաճը դրանից շատ ավելին է։

«Աղքատությունը, որով անցնում են բանվորները, աշխատողները, թոշակառուները և մարդիկ, հասել է մի կետի, որ այլևս չի կարող քողարկվել», – ասվում է խմբի  տարածած հայտարարության մեջ:

Նշվում է, որ ցածր եկամուտ ունեցող ընտանիքներն իրենց եկամտի 85 տոկոսը հատկացնում են ընդամենը երեք ապրանքային խմբի՝ սննդի, վարձակալության և տրանսպորտի ծախսերի վրա:

Պահանջելով աշխատավարձի բարձրացում առնվազն 86 տոկոսով, խմբի անդամներն ավելի ուշ այրել են իրենց աշխատավարձերի ցուցակները։  Պաշտոնական տվյալներով հունիսին Թուրքիայում աննախադեպ գնաճը հասել է 24 տարվա ամենաբարձր մակարդակին՝ 78,62 տոկոսի, որը  հիմնականում պայմանավորված է անցյալ տարվա վերջին արժութային ճգնաժամով և լիրայի շարունակական անկմամբ։  Տարբեր մասնագետների պնդմամբ՝ իրական գնաճն շատ ավելի բարձր է։

Էմմա Չոբանյան