06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Հայաստանում կանանց ներգրավվածությունը ՏՏ ոլորտում եվրոպական ցուցանիշից բարձր է․ Նարեկ Մկրտչյան․ ՏԵՍԱՆՅՈՒԹ
Հասարակություն
18.07.2022 | 16:54
«Գործընկերություն հանուն բաց հասարակության» նախաձեռնությունը, Բաց հասարակության հիմնադրամներ-Հայաստանը և Հայաստանում Եվրոպական Միության պատվիրակության գրասենյակը կազմակերպել են «Աշխատողների հզորացումն աշխատանքային բարեփոխումների միջոցով» քննարկումը։ Քննարկման են ներկայացված ՀՀ-ԵՄ միջև Համապարփակ և ընդլայնված գործընկերության համաձայնագրի (ՀԸԳՀ) իրականացման քաղաքացիական հասարակության համատեղ մշտադիտարկման շրջանակում իրականացված առաջարկները։
ՀՀ աշխատանքի և սոցիալական հարցերի նախարար Նարեկ Մկրտչյանը հայտնեց, որ նախատեսվում են օրենսդրական փոփոխություններ, կկազմակերպվեն քննարկումներ, որպեսզի օրենսդրական նախագիծն ավելի ներառական լինի:
Անդրադառնալով աշխատանքային օրենսգրքի բարեփոխումներին՝ նախարարն առանձնացրեց մի քանի կարևոր ուղղություն, որոնք իրականացնում է ՀՀ աշխատանքի և սոցիալական հարցերի նախարարությունը:
Նրա խոսքով՝ նախատեսվող օրենսդրական փոփոխությունների նպատակը առաջին հերթին Աշխատանքային օրենսգրքի կարգավորումները ՀՀ ստանձնած միջազգային պարտավորություններին համապատասխանեցնելն է, ինչպես նաև իրավակիրառ պրակտիկայում հանդիպող խնդիրներին լուծումներ գտնելը:
«Փոփոխությունները բազմաշերտ են, վերաբերում են և՛ գործատուներին, և՛ աշխատողներին, և՛ սոցիալական գործընկերներին: Առկա խնդիրները գտնվում են մեր ուշադրության կենտրոնում»,- նշեց Մկրտչյանը՝ հավելելով, որ նախագիծը քննարկվել է մի շարք շահագրգիռ կողմերի հետ, առաջարկություններն ու դիտողություններն արդեն ամփոփված են, և նախագիծը նեկայացվել է վարչապետի աշխատակազմ:
Նախարարի խոսքով՝ այս ամենին զուգահեռ աշխատանքներ են իրականացվում ՀՀ-ում աշխատանքային վեճերի արտադատական համակարգ ներդնելու ուղղությամբ: Նաև շրջանառության մեջ է դրվել աշխատողների անվտանգության ապահովման և առողջության պահպանման հիմնական կանոնները և նորմերը հաստատելու մասին Կառավարության որոշման նախագիծը:
«Կանանց ներգրավվածությունը մեր առաջնահերթություններից է, մենք կարողացել ենք ՄԱԿ-ի զարգացման գործակալության հայաստանյան գրասենյակի և էկոնոմիկայի նախարարության հետ մշակել կանանց տնտեսական զորեղացման ինքնատիպ ծրագիր… Հայաստանում կանանց ներգրավվածությունը ՏՏ ոլորտում եվրոպական ցուցանիշից բավականին բարձր է»,- նշեց նախարարը:
Նա նաև հավելեց, որ նախարարության առաջնահերթություններից է նաև հաշմանդամություն ունեցող անձանց համար աշխատանքային միջավայրի հարմարեցումը:
Մանրամասները՝ տեսանյութում:
